Երեք բուհ ավելի շատ կֆինանսնավորվի 2016-ին

Այսօր ԱԺ հանձնաժողովներում ԿԳ նախարար Արմեն Աշոտյանը ներկայացնում էր 2016թ. բյուջեով նախատեսված հատկացումներն ու ոլորտի բովանդակային քաղաքականությունը: Նա նախ նշեց, որ ոչ մի երկրում կրթությանը տրամադրվող գումարները չեն բավականացնում տվյալ երկրի կրթական խնդիրները միանգամից լուծելու համար, և այս տեսակետից՝ հատկացված գումարը միշտ քչություն է անում:

«Ոչ միայն քաղաքականությունն է հնարավորի արվեստ, այլ նաև բյուջետային հատկացումներն այդ հնարավորությունը կյանքի կոչելու մարտահրավեր են, ուստի ասել, որ կրթության բյուջեն ամբողջությամբ կարողանալու է արձագանքել բոլոր մարտահրավերներին, նույնքան սխալ է, որքան սխալ է ասել, որ տվյալ բյուջեն չի համապատասխանում մեր առջև դրված խնդիրներին»,- ասաց Արմեն Աշոտյանը:

Նա նշեց, որ այս բյուջեն պահպանման բյուջե չէ, այլ նաև գերակայություններն ու բարեփոխումները կյանքի կոչելու բյուջե: Որպես դրական միտում՝ նա նշեց բարձրագույն կրթության ֆինանսավորման աճը, մասնավորապես՝ Երևանի պետական կոնսերվատորիան, գեղարվեստի պետական ակադեմիան և կինոյի ու թատրոնի պետական ինստիտուտը կստանան ավելի շատ ֆինանսավորում: Նաև դրական միտումներից է այն, որ պետությունը ընդլայնում է իր սոցիալական քաղաքականությունը բարձրագույն կրթության ոլորտում: