Ով ավելի շատ ձեռք ուներ, նա ավելի շատ կոճակ սեղմեց (տեսանյութ)

ԱԺ ճեպազրույցի ընթացքում անդրադառնալով քառօրյայի ընթացքում 3 օր շարունակ քննարկվող «Ընտրական օրենսգրքում փոփոխություններ եւ լրացումներ կատարելու մասին» օրինագծերին` ՀՅԴ խմբակցության ղեկավար Վահան Հովհաննիսյանն ասաց, որ «այդ բանավեճում ՀՅԴ-ն հաղթեց, եւ դա փայլուն հաղթանակ էր», քանի որ հակառակ կողմը որեւէ լուրջ հակափաստարկ չկարողացավ ներկայացնել:

«Բոլորը, նաեւ մեր ընդդիմախոսները տեսան, որ մենք ճիշտ ենք, բայց մատերի քանակը հաղթեց: Սա աննորմալ երեւույթ է, սա չէ ժողովրդավարությունը: Այստեղ բիոմասսայի հաղթանակ տեղի ունեցավ. ով ավելի շատ ձեռք  ուներ, նա ավելի շատ կոճակ սեղմեց»,- նշեց նա:

Ըստ Վահան Հովհաննիսյանի` ՀՅԴ-ն ապացուցեց, որ համամասնական ընտրակարգը Հայաստանի համար շատ ավելի ընդունելի է, քան մեծամասնականը, եւ այդ հարցում էլ կոալիցիայի բերած հակափաստարկները «գրոշի արժեք չունեն»:

Խմբակցության ղեկավարն ասաց, որ հիմնական փաստարկը, որ բերվում էր կոալիցիոն ուժերի կողմից, այն է, որ ընտրողները կարող են դիմել իրենց ընտրատարածքից մեծամասնականով ընտրված պատգամավորին:

«Մեր խեղճ ժողովուրդն ո՞ւմ զանգի, եթե պրոբլեմ ունենա»,- հարցրեց նա եւ ներկայացրեց մի վիճակագրություն. մեծամասնական կարգով ընտրված 41 պատգամավորից 29-ը ընդհանրապես «ծպտուն» չեն հանել ընտրվելու պահից` ո´չ հայտարարություն են արել, ո´չ գրավոր հարցումով են դիմել, ո'չ էլ որևէ ելույթ են ունեցել որևէ հարցի վերաբերյալ, որն անմիջականորեն վերաբերում է «իբր թե իրենց ընտրողներին»:

Ըստ Վահան Հովհաննիսյանի ներկայացրած վիճակագրության` «29-ը ծպտուն չեն հանել, մեծամասնական ընտրակարգով ընտրված 7 պատգամավոր համեմատաբար ակտիվ են, 5-ը` հանել են 1-2 ծպտուն, այսինքն, օրինակ, հարց են տվել այսինչ գյուղում ջրատարը կամ դպրոցի տանիքը և այլն»:

Դաշնակցական պատգամավորը հարց տվեց` ժողովրդի հավատը նրանց նկատմամբ ինչո՞վ պետք է պայմանավորված լինի` «ծպտունների քանակո՞վ»:

Տեսանյութը տե'ս այստեղ: