Ազատամարտիկին ծեծի ենթարկելու գործով հարցաքննվել է Ռուբեն Հայրապետյանը

Ազատամարտիկ Սմբատ Հակոբյանին ծեծի ենթարկելու գործի շրջանակներում երեկ Քննչական կոմիտե է հրավիրվել ՀՖՖ նախագահ Ռուբեն Հայրապետյանը: Այս տեղեկությունը yerkir.am-ի հետ զրույցում հաստատեցին ՀՀ քննչական կոմիտեից:

Հիշեցնենք, որ դեպքի առթիվ 2015թ. սեպտեմբերի 22-ին ՀՀ Քննչական կոմիտեի Երևանի քննչական վարչության կենտրոն և Նորք-Մարաշ վարչական շրջանների քննչական բաժնում հարուցվել է քրեական գործ` ՀՀ քրեական օրենսգրքի 113-րդ հոդվածի 2-րդ մասի 3-րդ կետով: Քննության արդյունքներով՝ 2015թ. սեպտեմբերի 23-ին հիշյալ հանցավոր արարքը կատարելու համար մեղադրանք է առաջադրվել Երևան քաղաքի բնակիչներ Արարատ Գրիգորյանին, Հակոբ Պետրոսյանին և Արմեն Սարգսյանին: Նրանցից երկուսի նկատմամբ, որպես խափանման միջոց, ընտրվել է կալանավորումը, իսկ մեկը գրավի դիմաց ազատ է արձակվել:

Համաձայն Սմբատ Հակոբյանի նկատմամբ նշանակված դատաբժշկական փորձաքննության եզրակացության` նրան պատճառված վնասվածքների աստիճանը գնահատվել է ծանր։