Ռուբեն Հայրապետյանը ծեծի ենթարկված գործարարի հետ կապված ասելիք չունի

Արդեն տեղեկացրել ենք, որ մամուլում շրջանառվող տեղեկությունների համաձայն Ռուբեն Հայրապետյանի (Նեմեց Ռուբո) թիկնազորի անդամներն առևանգել եւ ծեծել են գործարար, «Էյր Արմենիա» ավիաընկերության 51 տոկոսի սեփականատեր և տնօրեն Արսեն Ավետիսյանին: Yerevan news-ի տեղեկությունների համաձայն` Արսեն Ավետիսյանի առևանգումը պայմանավորված է «Էյր Արմենիա» ավիաընկերության կուտակած ընթացիկ պարտքերի հետ «Տարոն-Ավիա» ընկերությանը: «Տարոն-Ավիա» ընկերության տնօրեն և սեփականատեր Գառնիկ Պապիկյանը, ըստ կայքի տեղեկությունների, «Էյր Արմենիա» ավիաընկերության պարտքը, վերածելով «գողական բազառի», պարտքը, այսպես ասած, հանձնել է Նեմեց Ռուբոյին: Այսօր արդեն ծեծի ենթարկված «Էյր Արմենիա» ավիաընկերության 51 տոկոսի սեփականատեր և տնօրեն Արսեն Ավետիսյանի կինը`՝ Իզաբելա Մելքումյանը բաց նամակով դիմել է նախագահ Սերժ Սարգսյանին ` ներկայացնելու իրավիճակը:

Նշված դեպքերի վերաբերյալ մեկնաբանություն ստանալու ակնկալիքով yerkir.am-ը կապ հաստատեց ՀՖՖ-ի նախագահ Ռուբեն Հայրապետյանի հետ: Նա հայտարարեց, որ լրատվամիջոցների հեռախոսային որևէ հարցի չի պատրաստվում պատասխանել: «Ես չեմ պատասխանի Ձեր ոչ մի հարցին: Ես լրատվամիջոցների հեռախոսային հարցերին չեմ պատասխանում»,- հայտարարեց Հայրապետյանը և անջատեց հեռախոսը: Ինչպես ասում են` մեկնաբանությունները թողնում ենք ձեզ: