Սա լավ նվեր է` Մարտի 8-ի առթիվ. Պլյուշչենկո

Oլիմպիական կրկնակի չեմպիոն, ռուս գեղասահորդ Եվգենի Պլյուշչենկոն վաղը  կմասնակցի Կարեն Դեմիրճյանի անվան մարզահամերգային համալիրում կայանալիք «Սառույցի թագավորները» շոուին: Անվանի մարզիկն այսօր հանդիպեց լրագրողների հետ:

«Ես տեսնում եմ, որ դուք անտարբեք չեք այս ամենի նկատմամբ: Ես 2 անգամ ելույթ ունեցել եմ Հայաստանում: Արդեն ավելի մեծ փորձ ունենք նման միջոցառում կազմակերպելու համար: Կարծում եմ՝ որ այս ամենը մեծ նվեր է կանանց մարտի 8-ի առթիվ:

Հիմա դժվար ժամանակներ են, եւ կարծում եմ՝ սա լավ առիթ է՝ հայ ժողովրդին ուրախացնելու համար:  Գեղասահքն իմ կյանքն ու իմ ապրելակերպն է:  Այն շատ բարդ ու հետաքրքիր մարզաձեւ է»,- ասաց Պլուշչենկոն:

Ռուս գեղասահորդն անդրադարձավ նաեւ Երեւանում Իրինա Ռոդնինայի անվան  նորաբաց մարզադպրոցին:

«Ես պատրաստ եմ  օգնել ու վարպետության դասեր կազմակերպել: Կարծում եմ՝ապագայում հայերը կունենան բարձրակարգ մարզիկներ»,- եզրափակեց Պլյուշչենկոն:

Նշենք, որ մարտի 5-ին Մարզահամերգային համալիրում կայանալիք «Սառույցի թագավորները» սառցե շոուին բացի Եվգենի Պլյուշչենկոյից կմասնակցեն նաև երգիչ Դիմա Բիլանը, Իրինա Սլուցկայան, Բրիան Ժուբերը, Տոմաշ Վերները, Գև Մանուկյանը, հայտնի ջութակահար Էդգար Հակոբյանը ու այլոք: