Ընդդիմությունն իշխանության հետ պատասխանատվություն է կրելու. Խոսրով Հարությունյան

ԱԺ ՀՀԿ խմբակցության պատգամավոր Խոսրով Հարությունյանն այսօր լրագրողների հետ հանդիպման ընթացքում անդրադարձավ սահմանադրական բարեփոխումների անհրաժեշտությանը:

Հարությունյանի խոսքով`Սահմանադրության նոր տարբերակի` խորհրդարանի կողմից հաստատված լինելը, հանրաքվեի օրվա նշանակված լինելը վկայում են այն մասին, որ մենք ընկղմվում ենք քաղաքական նոր դեբատների փուլի մեջ: «Շատ կարևոր է ժողովրդին ճիշտ իրազեկելը: Կողմ և դեմ արտահայտվողները հնարավորություն ունեն արտահայտելու իրենց կարծիքը: Հանրությանը տեղեկացնելու գործընթացից շատ բան է կախված:  Հաճախ են հնչում թեզեր, թե սահմանադրական բարեփոխումները պահանջված են հենց ժողովրդի կողմից»,- ասաց նա և հավելեց, որ շատ ու շատ քաղաքացիներ պատկերացում չունեն սահմանադրական բարեփոխումների մասին, և շատ ավելի կարևոր  է նրանց պատշաճ իրազեկելը:

Ըստ Հարությունյանի` սահմանադրական բարեփոխումների գործընթացը բնական էվոլուցիա է ապրել: «Այս սահմանադրական բարեփոխումները ադեկվատ են  երկրում տիրող զարգացումներին: Այս Սահմանադրությունն առաջարկում է կարևորագույն օրենքներ: Շատ մեծ հնարավորություն կա պատասխանատու ընդդիմություն ձևավորելու: Այսօր ընդդիմությունը որևէ հարցում պատասխանատու չէ, իսկ վաղը ընդդիմությունը իշխանության հետ պատասխանատվություն է կրելու»,- ընդգծեց պատգամավորը: