Ինչի՞ տենց ոգեւորվեցիք. վարչապետին ոմանց պահվածքը դուր չեկավ

Կառավարության այսօրվա նիստում էկոնոմիկայի նախարար Կարեն Ճշմարիտյանը ներկայացրեց ներդրումային քաղաքականության հայեցակարգը և դրանից բխող միջոցառումների ժամանակացույցը: Նա նշեց, որ հայեցակարգի գլխավոր նպատակն է բնութագրել Հայաստանի ներդրումային միջավայրը, սահմանել ներդրումային ոլորտում պետական քաղաքականության հիմնական նպատակները և նախանշել դրանց իրականացման համար անհրաժեշտ պետական քաղաքականության սկզբունքները, ուղղություններն ու միջոցառումները:

Առանձնացնելով հայեցակարգի ներդրումային քաղաքականության խնդիրներն ու նպատակները` նախարարն ընդգծեց, որ ներդրումային ոլորտում պետական քաղաքականության հիմնական խնդիրներն են` ներդրումային միջավայրի բարելավումը, օրենսդրական դաշտի կատարելագործումը և Հայաստանի Հանրապետության տնտեսության մեջ ներդրումների, այդ թվում` օտարերկրյա ուղղակի ներդրումների խթանումը:

«Ներդրումային քաղաքականության հիմնական նպատակն է ներդրումային և գործարար բարենպաստ միջավայրի ձևավորումը, կարգավորող միջավայրի թափանցիկության բարձրացումը, երկրի մրցակցային առավելությունների բացահայտումը, Հայաստանում իրականացվող ներդրումների ծավալների մեծացումը, շուկայական ենթակառուցվածքի զարգացումը, որակյալ և բարձր վարձատրվող աշխատատեղերի ստեղծումը, մարդկային կապիտալի զարգացումը և այդ բոլորի հիման վրա տնտեսական կայուն աճի և բնակչության բարեկեցության ապահովումը»,- ասաց Ճշմարիտյանը:

Նա նշեց՝ որպես խնդիրների լուծման և սահմանված նպատակներին հասնելու հիմնական գրավական` կառավարությունը կարևորում է մասնավոր հատվածում ներդրումների խրախուսումը՝ հստակ գիտակցելով, որ միայն տեղական մասնավոր հատվածի ջանքերը բավարար չեն` լուծելու այդ խնդիրը: Կառավարությունը ակտիվորեն փորձում է օտարերկրյա ներդրումներ ներգրավել՝ տնտեսական և սոցիալական ոլորտների գերակա նպատակների իրագործման համար:

Կարեն Ճշմարիտյանի զեկույցից հետո Հովիկ Աբրահամյանը դիմեց ներկաներին. «Ինչի՞ տենց ոգևորվեցիք, լավ բաներ է ասում դրա համա՞ր, թե՞ հավատ չի ներշնչում: Ո՞րն է պատճառը: Ես կարծում եմ, որ պարոն Ճշմարիտյանի ասածները լիովին հիմնավոր էին, և եթե որոշ մարդկանց դա դուր չի գալիս, դա իրենց ներքին և արտաքին պրոբլեմն է»: Վարչապետն այդպես էլ չմասնավորեցրեց, թե խոսքը կոնկրետ ում էր ուղղում: