Ի՞նչ եք Ձեզ թույլ տալիս. Վարդան Պետրոսյանի կատակը դատավորին դուր չեկավ

Արդեն հայտնել ենք, որ այսօր Կոտայքի մարզի ընդհանուր իրավասության դատարանում դերասան Վարդան Պետրոսյանը հայտնեց, որ մեղսագրված արարքում իրեն մեղավոր չի ճանաչում:

Տուժողների ներկայացուցիչ Ռուբեն Բալոյանը հայտնեց, որ լսել է ամբաստանյալի հարցազրույցը, որում նա նշել է, որ պատրաստ է որոշակի ժամկետով ազատազրկում կրել, և հետաքրքրվեց Պետրոսյանից, թե այդ դեպքում ինչո՞ւ իրեն մեղավոր չի ճանաչում: «Հուշել չկա»,- վերջում ակնարկեց ներկայացուցիչը, ինչն անարձագանք չթողեց Վարդան Պետրոսյանը: «Որ հուշի, երկուս կստանամ չէ՞, հանկարծ չհուշե՛ք»,- ասաց դերասանը:

«Դուք դատարոնւմ եք գտնվում, ոչ թե այլ տեղ, որ կարողանաք ելույթներ ունենալ: Ի՞նչ եք Ձեզ թույլ տալիս, որտե՞ղ պետք է երկուս ստանաք` դատարանո՞ւմ: Տեղյակ չե՞ք, որ դատարանում երկուս չեն ստանում»,-  ասաց դատավորը:

Թեև ամբաստանյալի պաշտպան Նիկոլայ Բաղդասարյանը փորձեց առարկել Բալոյանի ներկայացրած հարցի կապակցությամբ, սակայն Պետրոսյանը պատասխանեց. «Ես հենց իմ առաջին ելույթի օրն ասացի, որ այս գործը երկու կողմ ունի` բարոյական և իրավական: Հենց որ քայլ ենք անում օրենքի բնագավառում, անմիջապես հարց եք բարձրացնում բարոյական կողմից, երբ քայլ ենք փորձում անել բարոյական կողմից, անմիջապես իմ առջև հառնում է օրենքը»: Նա շեշտեց, որ Բալոյանն իրեն զուտ բարոյական հարց է տալիս: