Էդ խեղճուկրակ բիբին-միբիններին առաջ մի՛ քաշեք. տնտեսագետ

Տնտեսագետ Վարդան Բոստանջյանն այսօր լլրագրողների հետ զրույցում անդրադարձավ ՀԷՑ-ի վաճառքին: Նրա կարծիքով` ՀԷՑ-ի գնորդը` «Տաշիր» ընկերությունների խումբը, իր վրա վերցրել է բարդ խնդրի լուծում, քանի որ կան շատ բացեր, որոնց լուծումները ժամանակ են պահանջում:

«Բոլորին է հայտնի, որ ՀԷՑ-ը գտնվում է բավական վատ վիճակում: Դա իր արտացոլումն է ունեցել, և, փաստորեն, սակագինը բավականին բարձր է: Այս իրավիճակում մեզ պետք էր գտնել ելք, ես կասեի` փրկություն: Շատերն ասում են, որ 200 մլն դոլարի ներդրում է պետք, որ ՀԷՑ-ը կարգի հրավիրվի, բայց ես համոզված եմ, որ ժամանակակից էլցանցերում 500 միլիոնի ներդրում է պետք: Ես ուզում եմ մտածել, որ սա Սամվել Կարապետյանի կողմից ընդգծված նվեր է հայ ժողովրդին»,- ասաց Բոստանջյանը: 

Ըստ տնտեսագետի` Բիբինի անունը շահարկելը ճիշտ չէր, քանի որ նա պարզապես մեկն էր, ով պետք է այդպես գործեր: «Էդ խեղճուկրակ բիբին-միբիններին առաջ մի\' քաշեք»,- ասաց նա:

Անդրադառնալով ՀԷՑ-ում տեղի ունեցած չարաշահումներին` Բոստանջյանն ասաց. «Ախր մենք ենք բերել նրանց, ու հենց մենք էլ պետք է պատասխանատվություն կրենք: Մենք պարտավոր էինք հետևել նրանց աշխատաներին:  Հիմա արդեն կերել են, ի՞նչ անենք: Մեր հասարակությունը փակել էր կարևորագույն փողոցներից մեկը, ստիպված մի բան պիտի ասեին ու ասացին՝ աուդիտ»:

Ըստ տնտեսագետի` շատերն անգամ չհասկացան, թե ինչ պետք է ենթադրեր աուդիտը և ինչի համար էր այն անցկացվելու: