″Ձեր մուրն ու կեղտը վերցրեց, շառներդ քաշեք, գնացեք″

«Կուզեի` այս ամենը բարի ավարտ ունենար, իսկ ես նրանց, ովքեր ինձ վատություն են արել, ասեի` ձեր մուրն ու կեղտը վերցրեց, շառներդ քաշեք, գնացեք»,- այսօր լրագրողների հետ զրույցում նշեց նախագահական նստավայրի մոտ հացադուլ հայտարարած եւ նստացույց անցկացնող Աշոտ Խուդոյանը:

Նա հավաստիացնում է` իր վիճակն այժմ ծայրահեղ է, քանի որ իր դեմ դուրս են եկել պետական մարմինները` աջակցելով հանցագործներին:

«Սա տնտեսական հանցագործություն է եւ ոտնձգություն իմ սեփականության հանդեպ: Մարդիկ այնքան են շփացել, որ անգամ դատավորը փորձում է իմ եւ փաստաբանիս հարաբերությունները փչացնել, մեզ կռվացնել: Իմ դեմ ուղղված հստակ միտում եմ տեսնում, դատավորը պատկան մարմինների ասածն է անում»,- ասաց Խուդոյանը:

Նրա փաստաբան Սեդա Սաֆարյանն էլ նշեց, որ իրավական տեսանկյունից վտանգ կա` Խուդոյանն իր 4 երեխաների հետ կարող է հայտնվել փողոցում:

«Պատկերը շատ տխուր է, քանի որ այժմ ընթացող քաղաքացիական դատավարությունը տանում է նրան, որ Խուդոյանը հայտնվի փողոցում: Անհրաժեշտ է քրեական գործ հարուցել: Քաղաքացիական գործը հիմա կասեցվել է Խուդոյանի եղբոր մահվան պատճառով, այն կվերսկսվի միայն 6 ամիս անց»,- ասաց Սաֆարյանը: