Վեց ամիս էր մնացել, որ զորացրվեր, խեղճուկրակ ընտանիքից էր. մանրամասներ գիշերը Արցախում զոհված զինվորի մասին

Արդեն հայտնել ենք, որ այս գիշեր ՊԲ հարավային ուղղությամբ տեղակայված զորամասերից մեկի պահպանության տեղամասի մարտական հենակետում մահացու հրազենային վիրավորում է ստացել զինծառայող` 1995թ. ծնված Սուրեն Փիլոսյանը:

Yerkir.am-ի տեղեկություններով` զինվերը մահացել է ժամը 2-ի սահմաններում` մեծ տրամաչափի զենքի արկից` գլխից վիրավորվելով:

Մեր տեղեկություններով` Ս. Փիլոսյանը Լոռու մարզի Սարահարթ գյուղից էր, ընտանիքի միակ արու զավակը, զորացրվելուն մնացել էր վեց ամիս:

Yerkir.am-ի հետ զրույցում Սարահարթի գյուղապետ Վասիլ Փիլոյանը հայտնեց, որ Փիլոսյանների ընտանիքն ապրում էր ծանր սոցիալական պայմաններում, հայրը չի աշխատում, քանի որ առողջական խնդիրներ ունի, միայն զբաղվում են գյուղատնտեսական գործերով: Նրա խոսքով` Սուրենը զորակոչվել էր դպրոցն ավարտելուց անմիջապես հետո, իրենից փոքր`  դպրոցական քույր ունի:

«Իրանց համար մի կերպ յոլա էին գնում, խեղճուկրակ ընտանիք է, ծուխը մարավ…»,- ասաց գյուղապետը: