Միայն հիվանդությունը բավարար չէ հաշմանդամ ճանաչվելու համար. մասնագետ

ՀՀ աշխատանքի և սոցիալական հարցերի նախարարության բժշկասոցիալական փորձաքննության գործակալության պետ Արմեն Սողոյանն այսօր լրագրողների հետ զրուցեց բժշկասոցիալական փորձաքննության ոլորտում առկա խնդիրներին:

Խոսելով հաշմանդամություն ունեցող անձանց կարգավիճակի մասին` նա ասաց, որ միայն հիվանդության առկայության դեպքում չէ, որ մարդը համարվում է հաշմանդամություն ունեցող. պետք է անցնի համալիր հետազոտում, որպեսզի ընդունվի հաշմանդամության մասին որոշում: Այդ որոշումն ընդունողները բժշկասոցիալական ոլորտի փորձագետներն են:

«Միայն հիվանդության առկայությունը բավարար չէ հաշմանդամ ճանաչվելու համար: Պետք է առկա լինի նաև  կայուն կենսագործունեության խանգարում: Պետք է մարդու մոտ խաթարված լինեն ուսումնառության, աշխատանքային գործունեությամբ  զբաղվելու, ինքնագործունեության, կողմնորոշվելու, հաղորդակցվելու, սեփական վարքը հսկելու կարողությունները և երեխաների համար էլ` խաղալու կարողությունը»,- ասաց Սողոյանը` հավելելով. «Հաշմանդամությունը ստատիկ վիճակ չէ, եթե մարդը ճանաչվեց հաշմանդամ, չի նշանակում, որ էլ հնարավոր չէ որևէ բան անել: Բավականին ակտիվացել են վերականգնողական օգնությունը բարելավող աշխատանքները: Յուրաքանչյուր քաղաքացի, ով հաշմանդամություն ունի, նրա համար կազմվում է նաև անհատական վերականգնման ծրագիր»:

Ի դեպ, նրա խոսքով, հանրապետությունում գրանցված 200 401 հաշմանդամություն ունեցողներից 136 713-ը համարվում են անժամկետ հաշմանդամություն ունեցողներ: «Անժամկետ են համարվում այն մարդկանց հաշմանդամությունները, ովքեր յոթ տարուց ավելի նույն խնդիրն ունեն և վերականգնողական կուրսեր անցնելուց հետո որևէ դրական արդյունքի չեն հասել` կենսաթոշակառուները, հիվանդների որոշակի ցանկին համապատասխանություն ունեցողները, մեկ աչքի բացակայությամբ մարդիկ և այլն»,- ասաց մասնագետը:

Ըստ նրա` հանրապետության տարածքում հաշմանդամություն ունեցող անձանց 1,1 տոկոսը երեխաներ են: Սողոյանը նշեց նաև, որ մեր երկրում առաջին կարգի հաշմանդամություն ունի տասը հազար մարդ, երկրորդ կարգի հաշմանդամություն` քառասուն հազար մարդ, իսկ երրորդ կարգի հաշմանդամություն` շուրջ հարյուր հազար:

Նա տեղեկացրեց նաև, որ տարեկան մոտ 70 հազար մարդ հետազոտվում է, որոնցից 3000 հազարին հաշմանդամություն չի վերագրվում: «Մարդիկ դժգոհում են սրանից, բայց, դե, հետազոտության արդյունքներն այլ բանի մասին են խոսում»,- նշեց բժշկասոցիալական փորձաքննության գործակալության պետը: