Գալուստ Սահակյանը երազում ուսուցիչ է աշխատում (տեսանյութ)

Արդեն տեղեկացրել ենք, այսօր ԱԺ նախագահ Գալուստ Սահակյանը սեպտեմբերի 1-ի կապակցությամբ այցելեց թիվ 89 միջնակարգ դպրոց:

Սահակյանը լրագրողների հետ զրույցում հիշեց իր ուսուցչական կարիերան, այնուհետև խոսեց իր քաղաքական ուղին ընտրելու մասին` նշելով, որ իրավիճակն էր այդպիսին, և ինքն ակամա է ընտրել քաղաքական ուղին: «Նույնիսկ լինելով ՀՀ ԱԺ նախագահ` համարում եմ, որ ամենամեծ պաշտոնը դպրոցի տնօրենի պաշտոնն է: Այդպիսին էր նաև հայրս»,- ասաց նա` հավելելով, որ դժվար թե նորից վերադառնա դպրոց` դասավանդելու:

Հարցին` եթե սահմանադրական բարեփոխումները տապալվեն, և ՀՀԿ-ն հեռանա իշխանությունից, հնարավո՞ր է վերադառնա` ուսուցիչ աշխատելու, Գալուստ Սահակյանը պատասխանեց. «Դրանք նպատակներ չեն, ես այսօր էլ եմ դասատու աշխատում, օրինակ` երազում, հաճախ հանդիպում եմ ուսուցիչների հետ»:

Հարցին, թե արդյո՞ք ԱԺ-ում պատգամավորների շրջանում կա՞ գրագիտության պակաս, պատասխանեց, որ «իրենց պայմաններում սկզբունքի պահպանումն է», իսկ ընդհանրապես` քննություն չի ընդունում: