Շատ խոշորներ շատ ազնիվ են աշխատում. Գալուստ Սահակյանը՝ Զոհրաբյանին

Այսօր ԱԺ նիստում, երբ քննարկվում էր «Շրջանառության հարկի մասին» օրենքը հետաձգելու մասին հարցը, ԱԺ ԲՀԿ խմբակցության քարտուղար Նաիրա Զոհրաբյանը նշեց, որ հետաձգումը հարցի լուծում չի նշանակում:

«Այստեղ խոսվեց ՓՄՁ-ների միջոցով խոշորներին հայտնաբերելու մասին: Հայաստանի իշխանությունները լավ գիտեն, թե ովքեր են այդ խոշորները, որոնք պարբերաբար սպասարկում են իրենց կեղծված ընտրությունները: Շատ լավ գիտենք, թե ինչպես է մաքսակետերում այդ խոշորների այս կամ այն ապրանքը մի հրաշքով տրանսֆորմացվում այլ ապրանքի, որպեսզի մաքսատուրքերը նվազեն»,- ասաց պատգամավորը` դարձյալ ընդգծելով, որ իշխանություններն անուն առ անուն գիտեն, թե որոնք են այն խոշորները, որոնք իշխանությունների թողտվությամբ են գործում, որովհետև հերթական ընտրությունների ժամանակ պետք են գալու իշխանություններին:

Նաիրա Զոհրաբյանի ելույթին արձագանքեց ԱԺ նախագահ Գալուստ Սահակյանը` ասելով. «Խոշորներ, որ ասում եք` բոլորին պետք է վերաբերի: Շատ խոշորներ շատ ազնիվ են աշխատում, և մենք տեղյակ ենք»: