Զախարյանը պարզաբանում է` ինչ միջոցներով են վճարել նաիրիտցիներին

«Նաիրիտ» գործարանի մամուլի խոսնակ Անուշ Հարությունյանը yerkir.am-ի հետ զրույցում հայտնեց, որ գործարանի բոլոր աշխատակիցները վերջապես ստացել են իրենց աշխատավարձերը:

«Վերջին 600 աշխատակիցներն էլ ստացան իրենց աշխատավարձերը: Այսօր մինչև ժամը վեցը բոլորի հաշվին կնստի աշխատավարձերը»,- ասաց մամուլի խոսնակը:

Կապ հաստատեցինք նաև ՀՀ Էներգետիկայի և բնական պաշարների նախարար Երվանդ Զախարյանի հետ` տեղեկանալու` ինչ միջոցներով են վճարվել նաիրիտցիների աշխատավարձերը:

 ««Որոտան»-ի վաճառքից եկած գումարներից  են այդ միջոցները»,- պատասխանեց նախարարը:

Հիշեցնենք, որ դեռևս հուլիսի 8-ին yerkir.am-ը հարցում էր ուղարկել կառավարություն՝ հասկանալու, թե արդեն կա՞ այն գումարը, որով կվճարվեն նաիրիտցիների աշխատավարձերը, որքա՞ն է այն կազմում և որտեղի՞ց է հայթայթվել կամ գուցե նոր հայթայթվելու: Անցել է գրեթե մեկ ամիս, բայց կառավարությունից որևէ արձագանք չկա: 

 Հիշեցնենք, որ էլեկտրաէներգիայի սակագնի սուբսիդավորումը ևս կատարվելու է «Որոտան»-ի վաճառքից գոյացած գումարներով: