Հալլեի նվագախմբի նոր ակցիան` հանդիսատեսը կվճարի համերգից հետո

Բրիտանական ամենահայտնի նվագախմբերից մեկը` Հալլեի սիմֆոնիկ նվագախումբը, ուշագրավ մի որոշում է կայացրել. նվագախումբը հանդես կգա համերգով, որից հետո միայն հանդիսատեսը կվճարի տոմսերի համար:

BBC-ն տեղեկանում է, որ երաժիշտները նշել են, որ համերգից հետո հանդիսատեսը կմոտենա դրամարկղին և կվճարի այնքան, որքան, նրանց կարծիքով, արժեր ելույթը: «Վճարեք` որքան ուզում եք»,- գրված է նվագախմբի կայքում: Ի դեպ, սովորաբար, նվագախմբի համերգների տոմսերի գինը կազմում է 60 դոլար:

Ակցիան, որը նվագախումբը կյանքի կկոչի սեպտեմբերին, նպատակ ունի դասական երաժշտության համերգներին դահլիճ բերել մարդկանց, որոնք երբեք չեն գնացել նման համերգների: