Վարկային համաձայնագիրը անվտանգության կոմպլեքս խնդիր է լուծելու. փոխնախարար

Այսօր ԱԺ` կառավարության նախաձեռնած արտահերթ նիստում քննարկվում է ՀՀ նախագահի ներկայացրած` ՀՀ կառավարության և ՌԴ կառավարության միջև կնքված` ՀՀ կառավարությանը 200 միլիոն դոլարի չափով պետական արտահանման վարկ տրամադրելու մասին համաձայնագրի վավերացման հարցը:

Հիմնական զեկուցող` պաշտպանության փոխնախարար Արա Նազարյանին հարց ուղղեց ԱԺ ՀՅԴ խմբակցության պատգամավոր Արծվիկ Մինասյանը: «Սա միայն մեր սպառազինությա՞ն մեջ է փոփոխություն բերում, թե՞ սահմանապահ հատվածում անվտանգության համակարգերն էլ է ուժեղացվելու: Մյուս հարցը վերաբերում է համաձայնագրի ֆինանսական մասին` ինչո՞վ է պայմանավորված, որ ՀՀ և ՌԴ միջև ֆինանսական հարաբերությունները կառուցվում են դոլարով, մինչդեռ դրանք պետք է ռուբլիով լինեին: Արդյո՞ք քննարկվել է այս հարցը»,- հարցրեց պատգամավորը:

Արա Նազարյանը նշեց, որ ձեռք բերվող ռազմական տեխնիկան նաև ուղղվելու է սահմանապահ հատվածի ամրապնդմանը, այսինքն` այն կոմպլեքս խնդիր է լուծելու: Ինչ վերաբերում էր դոլարով համաձայնագրի կնքմանը, փոխնախարարը նշեց, որ դա եղել է ռուսական կողմի քաղաքականությունը: