Երբ հայհոյում էին հայերին, Եսայանը փորձում էր կոծկել դրանք. լարվածություն՝ Թուրքիայում հայ պատգամավորների միջև

Թուրքիայում քրդամետ Ժողովուրդների դեմոկրատական կուսակցությունից հայ պատգամավոր Կարո Փայլանը հարցազրույց է տվել լրագրող Ահմեդ Հաքանին:

Հարցազրույցի ընթացքում Փայլանը հայ պատգամավորների մասին ասել է, որ Մեջլիսում կարևորը միայն նրանց հայ լինելը չէ, այլ այն, թե նրանք ինչ են պաշտպանում:

Ըստ «Ակօս»-ի՝ Փայլանն անդրադարձել է «Արդարություն և զարգացում» կուսակցությունից հայ պատգամավոր Մարգար Եսայանին և նրան սուր քննադատությունների ենթարկել:

«Միայն այն, որ նա հայ է, ինձ համար շատ բան չի նշանակում» ասելով՝ Փայլանը թվել է Եսայանի մասին այդ կարծիքն ունենալու պատճառները:

«Գեզիի և Քոբանիի իրադարձություններն անտեսել է: Այն ժամանակ, երբ հայերին հայհոյում էին, երբ «հայ» բառն արտասանելուց առաջ «կներեք» էին ասում (Էրդողանի աղմկահարույց ելույթը), Մարգարն անընդհատ փորձում էր կոծկել դրանք՝ ասելով. «Իրականում այդպես չեն ցանկացել ասել»: Այդ մեղքերն իրագործվելիս նա «լիդերություն» մասին էր զառանցում: Ինձ համար կարևորն այն է, թե նա ինչ է ասում, ինչն է պաշտպանում»,- ասել է նա:

«Եթե կարևորը հայ լինելը չէ, ապա ի՞նչն է» հարցին՝ Փայլանը պատասխանել է. «Կարևորը մեր ասելիքն է ու այն, թե ինչ ենք պաշտպանում: Կարևորն այն է` մենք պաշտպանում ենք համատեղ ապրելու փո՞րձը, թե՞ «միակ մարդը լինելու» ծրագիրը: Այսուհետ կարևորը սա է»:

Նա նաև նշել է, որ Եսայանի հետ իրենք ընկերներ են դեռ հին ժամանակներից, սակայն այժմ տարբեր գաղափարներ պաշպանող երկու հայեր են իրենք:

Փայլանն անդրադարձել է նաև Ժողովրդա-հանրապետական կուսակցությունից  ազգությամբ հայ պատգամավոր Սելինա Դողանին: «Նրա ներկայությունն ինձ ուրախացնում է:  Իմ սիրելի բարեկամն է, իմ ընկերը: Կարծում եմ՝ կարող ենք միասին աշխատել»,- ասել է նա:

Լրագրողի հարցին, թե, համախմբվելով Մեջլիսում, իրենք՝ երեք պատգամավորներով, հայերի հարցերը կարո՞ղ են բարձրացնել, Փայլանը պատասխանել է. «Եթե կարողանանք գտնել քաղաքական մի նոր լեզու, իհարկե: Եթե նկատեմ, որ Մարգարն ապաշխարում է, անշուշտ, կարող ենք միասին գործել»:

Հարցին, թե, ապաշխարել ասելով, ի՞նչ նկատի ունի, նա պատասխանել է, որ խոսքը «Արդարություն և զարգացում» կուսակցության անդամ Մարգար Եսայանի թույլ տված սխալների մասին է:

Հիշեցնենք, որ Թուրքիայում խորհրդարանական ընտրություններից առաջ ԱԶԿ-ի հայ պատգամավոր Մարգար Եսայանը հայտնել էր, որ բարձրաստիճան պաշտոնյաները խոստացել են Թուրքիայի հայկական որբանոցը հայկական հիմնադրամին վերադարձնել, և անձամբ ինքը միջամտել է հարցին: Հետագայում Թուրքիայի հայկական «Նոր Զարթօնք» միությունը բացահայտնել էր, որ Եսայանի այդ հայտարարությունը կեղծ է և զուտ քարոզչական նպատակ է հետապնդել, ինչի վառ ապացույցն էլ որբանոցի սեփականությունը վերադարձնելու ուղղությամբ մինչ օրս չձեռնարկված քայլերն են եղել:

Թարգմանությունը՝ Արազ Գայմագամյանի