Ինչո՞ւ էին լրագրողներին հայհոյում, թող Տարոն Մարգարյանին հայհոյեին

ԱԺ այսօրվա նիստում ԱԺ ՀԱԿ խմբակցության պատգամավոր Նիկոլ Փաշինյանն անդրադարձավ տնտեսագիտական համալսարանում քաղաքապետ Տարոն Մարգարյանի թեկնածուական թեզի պաշտպանության ժամանակ տեղի ունեցած սկանդալային միջադեպին:

Նշենք, որ նրա ելույթը պարբերաբար ընդհատում էր ԱԺ փոխնախագահ Էդուարդ Շարմազանովը՝ հորդորելով Նիկոլ Փաշինյանին ելույթ ունենալ ԱԺ օրակարգի սահմաններում: Շարմազանովն անգամ հայտարարեց, որ ԱԺ նախագահը պատասխանել է այդ հարցին, եւ դա այն դեպքում, երբ Փաշինյանն անգամ հարցը չէր հասցրել հնչեցնել:

«Տնտեսագիտական համալսարանը խուլիգանների ո՞րջ է: Ինչո՞ւ հեռացված չեն ռեկտորը և այդ խուլիգանները, մի՞թե Հովիկ Աբրահամյանի ու Սերժ Սարգսյանի հետ այդ խուլիգանների լուսանկարները նշանակում են, որ նրանք ինդուլգենցիա ունեն` օրենքը խախտելու: Նրանք խախտել են քրեական օրենսգրքի երկու հոդված՝ լրագրողի մասնագիտական գործունեության խախտում և խուլիգանություն: Ինչո՞ւ նրանք չեն կրել պատասխանատվություն ու չեն հեռացվել բուհից»,- ԱԺ նախագահին հարցրեց Նիկոլ Փաշինյանը:

Հովիկ Աբրահամյանը կոչ արեց Նիկոլ Փաշինյանին` չանցնել կոռեկտության սահմանը: «Ձեր հարցը համարում եմ կոռեկտության սահմաններից դուրս: Ձեզ համար սովորույթ է դարձել վիրավորել մարդկանց, ինչը ճիշտ ու հիմնավոր չէ: Չի կարելի վիրավորել այլ գերատեսչությունների ղեկավարներին, չեմ կիսում ձեր տեսակետը»,- ասաց ԱԺ նախագահը՝ հավելելով, որ, որպես տվյալ բուհի խորհրդի նախագահ, պատրաստ է այդ հարցին անդրադառնալ, թեև, իր կարծիքով, դա ավելի շատ շինծու գործ էր, և ցանկացել են ստվեր գցել քաղաքապետի գործունեության վրա:

Նիկոլ Փաշինյանը նախ` ԱԺ դե ֆակտո փոխնախագահին կոչ արեց մնալ սեփական լիազորությունների շրջանակներում և չգերազանցել դրանք: «Իսկ Հովիկ Աբրահամյանին ուզում եմ ասել` երբ ասում եք, որ տնտեսագիտական համալսարանում ցանկացել են ստվեր գցել Տարոն Մարգարյանի անվան վրա, այդ դեպքում ինչո՞ւ էին լրագրողներին հայհոյում, թող Տարոնին հայհոյեին»,- ասաց նա: