Լիսկայի որդու մասնակցությամբ ծեծկռտուքի ժամանակ տուժած երիտասարդին Մոսկվայում կվիրահատեն

Yerkir.am-ի տեղեկություններով՝ մայիսի 2-ին Գորիսի Սդղի գյոլ տարածքում տեղի ունեցած ծեծկռտուքի արդյունքում վիրավորված Հարություն Զաքարյանի մոտ աչքի բորբոքային խնդիրներ են առաջացել: Նշենք, որ Հարությունը ներկայումս գտնվում է Մոսկվայում՝ կնոջ, երեխայի և հոր հետ: Նա ստուգվել է Մոսկվայի մի քանի հիվանդանոցներում, սակայն բժիշկները տեսողության վերականգնման հույս չեն տվել: Մեր տեղեկություններով՝ առաջիկայում Մոսկվայում Հարությունին կրկին կվիրահատեն:

Ծեծկռտուքից տուժած մյուս եղբայրը՝ Մուշեղը, ով վերջերս էր վիրահատվել, դեռևս գտնվում է հիվանդանոցում, նրան խնամում է մայրը՝ տիկին Անահիտը: Մուշեղը ներկայումս սուր ցավեր ունի, հատկապես`  դիմածնոտային շրջանում:

Հիշեցնենք, որ օրեր առաջ քննիչներին վերջապես հաջողվել էր ցուցմունք վերցնել Մուշեղից: Մինչ այդ նա հրաժարվում էր խոսել կատարվածի մասին:

Մինչ այժմ այս գործով ներգրավված որևէ կասկածյալ կամ ձերբակալված անձ չկա: Գործով հարկադիր բերման ենթարկելու որոշում էր կայացվել Սյունիքի մարզպետի որդու՝ Տիգրան Խաչատրյանի նկատմամբ, ով դեպքից հետո լքել էր հանրապետությունը, սակայն երկու օր առաջ ներկայացել ոստիկանության Գորիսի բաժին և հարցաքննվել: Նրա՝ այս գործով կարգավիճակի վերաբերյալ առայժմ որևէ տեղեկություն հայտնի չէ: