Կարեն Անդրեասյանը «աղբյուրներ չունի», Լիսկայի որդու «հերոսության» մանրամասներին էլ չի տիրապետում

Այսօր ՄԻՊ Կարեն Անդրեասյանը, լրագրողների հետ զրույցում պատասխանելով հարցին, թե անհրաժե՞շտ էր դիմում-բողոք, որ ՄԻՊ-ն անդրադառնար Սյունիքի մարզպետ Սուրիկ Խաչատրյանի որդու մասնակցությամբ հերթական աղմկահարույց դեպքին, երբ ծեծի են ենթարկվել երկու եղբայրներ, պատասխանեց, որ բողոքի առկայությունը իսկապես կարևոր հանգամանք է, թեև` ոչ պարտադիր:

Նրա խոսքով` եթե գործը զանգվածային բնույթ չի կրում, ապա ՄԻՊ-ն իր անձնական նախաձեռնությամբ միջամտելու լիազորություն չունի, միայն հազվադեպ գործեր կան, երբ ՄԻՊ-ն իր անձնական նախաձեռնությամբ կարող է սկսել գործի վարույթը:

«Եթե կապացուցվի, որ այն անձինք, որոնց անունները դուք նշում եք, իսկապես ներգրավված են, ես էլ կմիանամ այդ վրդովմունքին: Այս պահին իրարամերժ տեղեկություններ են շրջում, մենք չունենք մեր աղբյուրները, որ հիմնավոր ասենք, թե ով է եղել միջադեպում, և ինչպիսի իրադարձություն է եղել: Ես անձամբ տեսել եմ տուժողի մոր հարցազրույցը և շատ մտահոգվել եմ: Եթե ուզում ենք արդար իրավական գործընթաց, ապա տուժողները ևս պետք է մասնակցեն այս գործընթացին` պաշտպանելով իրենց իրավունքները: Ես առաջարկում եմ նրա`նց համապատասխան դիմումով կապվել մեզ հետ: Գոնե մեկ զանգ լինի տուժողների կողմից»,- ասաց Կարեն Անդրեասյանը` հավելելով, որ դիմումը բյուրոկրատական քաշքշուկներ չի ենթադրում, դա կարելի է անել հեռախոսի միոջոցով կամ էլեկտրոնային փոստով: