Ռուսաստանը կատարել է իր ընտրությունը. Лента.ру-ի հոդվածը

Лента.ру-ն  «Հայկական ողբերգության 100 տարին» հոդվածով անդրադարձել է Հայոց ցեղասպանությանը: Հոդվածը` կրճատումներով, ներկայացնում ենք ստորև: 

Ապրիլի 24-ին աշխարհը հիշում է Օսմանյան կայսրությունում իրականացված Հայոց ցեղասպանությունը: Անկարան նույն օրը նշում էր Գալիպոլիի ճակատամարտում տարած հաղթանակի 100-ամյակը:  100-ամյա վաղեմության իրադարձությունները ազդեցին հայ-թուրքական հարաբերությունների զարգացման վրա և ստիպեցին համաշխարհային առաջնորդներին ընտրել Հայաստանի ու Թուրքիայի միջև:

Թեև անցել է 100 տարի, սակայն Ցեղասպանության` համաշխարհային մասշտաբով ճանաչման մասին չենք կարող խոսել: Ցեղասպանությունը մինչ օրս պաշտոնապես ճանաչել են Ռուսաստանը, Գերմանիան, Ֆրանսիան, Իտալիան և մի շարք այլ երկրներ:

Առանձնահատուկ դիրքորոշում ունի ԱՄՆ-ը: Սենատոր Օբաման 2008-ի ընտրարշավի ժամանակ խոստացել էր ճանաչել Հայոց ցեղասպանությունը, սակայն մինչ օրս չի կատարել խոստումը: Դա կանխատեսելի էր. Թուրքիան շարունակում է ԱՄՆ-ում ընկալվել որպես առանցքային գործընկեր Մերձավոր Արևելքում:

Թուրքիայի՝ ապրիլի 24-ին Գալիպոլիի դեպքերը նշելու որոշումը բուռն արձագանք գտավ Հայաստանում: Հայկական կողմը հայտարարեց, որ այդ կերպ Թուրքիան ցանկանում է շեղել համաշխարհային հանրության ուշադրությունը Հայոց ցեղասպանության 100-ամյա տարելիցից: Եվ, դատելով ամեն ինչից, ճշմարտության բաժին այստեղ կա: Կողքից նայող մարդը պետք է մի պահ մտածի՝ ինչո՞ւ Թուրքիան որոշեց նշել այդ իրադարձությունները հենց ապրիլի 24-ին, եթե ճակատամարտը տեղի է ունեցել 1915-ի մարտի 18-ին և շարունակվել մինչև 1916-ի հունվար...

Թուրքիայի համար հայերի, հույների, ասորիների ցեղասպանության ճանաչումը բացասական հետևանքներ կունենա: Այսպիսով՝ այս հարցը դեռ հեռու է վերջնական լուծումից:

Ռուսաստանը, սակայն, այդ բանավեճում իր ընտրությունը կատարել է: Պետդուման ճանաչել է Հայոց ցեղասպանությունը դեռևս 1995-ի ապրիլի 14-ին: Չնայած «Թուրքական հոսք» նախագծի իրականացմանը՝ նախագահ Պուտինը  ընդունել է  ՀՀ նախագահ Սարգսյանի՝ ապրիլի 24-ին Երևան այցելելու հրավերը: Իսկ Թուրքիա է ուղարկվել Պետդումայի նախագահ Սերգեյ Նարիշկինը: