«Կինոն դարձել է նրբերշիկի արտադրության պես մի բան, ով ուզում` կինո է նկարում»

Մշակույթի նախարարի հրամանով ստեղծվել է հանձնաժողով, որն աշխատում է կինոյի մասին օրենքի նախագծի վրա:

Լրագրողների հետ հանդիպման ժամանակ կինոռեժիսոր Էդգար Բաղդասարյանը նշեց, որ կինոյի ոլորտում նման կերպ շարունակվել չի կարող: Ըստ նրա` 1990-ականներին, երբ ՀՀ վարչապետը Հրանտ Բագրատյանն էր, իրենք զրուցել են նրա հետ և ասել կինոյի մասին օրենք ունենալու և կինոարտադրողներին որոշակի արտոնություններ տալու մասին, սակայն Բագրատյանն ասել է, թե կինոարտադրողն ու նրբերշիկ արտադրողը պետք է նույնկերպ հարկվեն: «Արդյունքում` մեր կինոն նրբերշիկ դարձավ, նրբերշիկի արտադրության պես` յուրաքանչյուր շքամուտքում 7 ռեժիսոր և 60 դերասաններ հայտնվեցին»,- ասաց Բաղդասարյանը:

Նրա կարծիքով` կինոյի մասին օրենքը նախ պետք է նպաստի մասնավոր սեկտորի ներդրումներին, հետո արդեն միջազգային հարաբերությունները` համատեղ արտադրություն, արտահանում, կարգավորի:

«Կինոյի մասին օրենքը պետք է սահմանի, որ անհրաժեշտ է մի մարմին լինի, որը լիցենզիա կտա ոչ թե ֆիլմին, այլ սկսած այն մարդուց, ով նկարահանում է այդ ֆիլմը: Կինոթատրոններն էլ իրենց հերթին չպետք է ցուցադրեն լիցենզիա չունեցող ֆիլմեր»,- ասաց կինոռեժիսորը: