ՏԵՍԱՆՅՈՒԹ․ Անձնագիրը նկարում է, կոդը չի նկարում․ ՌԴ մեկնողները խնդիրների են բախվել

Անձնագիրը նկարում է, կոդը չի նկարում՝ ըստ Yerkir.am-ի հայտարարեց Ռուսաստան մեկնել ցանկացող քաղաքացիներից մեկը, որը հենց օդանավակայանում՝ թռիչքից առաջ պարզել է, որ թույլ չեն տալիս մեկնել։

Բանն այն է, որ փետրվարի 1-ից, եթե կորոնավիրուսի թեստի պատասխանը բացասական լիներ, քաղաքացիները կարող էին մեկնել ՌԴ, բայց այսօր «Զվարթնոց» օդանակայանում նրանցից շատերին թույլ չեն տվել՝ կորոնավիրուսի թեստի բացասական լինելը նշող կոդի պատճառով։

«Որոշում է եղել, որ գնում ես կորոնավիրուսի թեստ ես տալիս, եթե բացասական է, նորմալ է, կոդ ես քաշում հեռախոսիդ վրա, էդ կոդով թռչում ես Մոսկվա: Հիմա եկել, հասել ենք այստեղ, ժամը 12-ին թռիչքն է: Անձնագիրը նկարում է, կոդը չի նկարում: Ասում է՝ մեզ կառավարությունը դրա համար չի զգուշացրել»,-ասաց քաղաքացին։

Մեկ ուրիշին 2 օր առաջ օդանավակայանում ասել են, որ եթե թեստի բացասական պատասխանի կոդն ունենա, կարող է թռչել։

«Ենթադրենք, իրենց ասած հեռախոսից ես չունեմ, ո՞նց է օրենքը էդպես աշխատում: Տոմսն առել ենք 151 հազար դրամով: Մեզ ասել են՝ գնացեք թեստ տվեք, մենք թեստը տվել ենք, եղել է բացասական: Ասել են՝ կթռչեք, խնդիր չունեք, գնացեք այս շտրիխ կոդը դրեք: Կոդը բոլորինս դրած է, բայց այդ կոդը չի նկարում»,-ասաց նա:

Քաղաքացիներից մեկն էլ նշեց, որ պարտք են արել, տոկոսով փող են վերցրել, տոմս գնել՝ ո՞վ է տալու։

Հիշեցնենք, որ փետրվարի 1-ից մեկ ամսով ՀՀ քաղաքացիները իրավունք են ստացել մեկնել ՌԴ։ Դեպի Մոսկվա 4 չվերթ կիրականացնեն «Armenia», «Aeroflot» և «Red Wings» ավիաընկերությունները: