Ադրբեջանը ունի 60-70-ականների արտադրության տանկեր եւ 70-ական արտադրության ինքնաթիռներ. քաղաքագետ

Yerkir.am-ի հետ զրույցում Կովկասի ինստիտուտի փոխտնօրեն, քաղաքագետ Սերգեյ Մինասյանն անդրադարձավ հակամարտության գոտում խաղաղապահների տեղակայման և արդիական բանակի թեմային:

Ըստ նրա` խաղաղապահների ներգրավմանը դեմ է ոչ միայն Արցախը, այլ նաև Ադրբեջանը: Խաղաղապահների ներգրավումը իմաստ ունի միայն այն դեպքում, երբ տեսանելի են հակամարտության քաղաքական լուծման և կոմպրոմիսների գնալու ճանապարհները: Այս պահին, ըստ Սերգեյ Մինասյանի, այդ ուղիները տեսանելի չեն:

 Հարցին, թե կարո՞ղ ենք ասել, որ այսօր հայկական բանակն արդիականացված է, որովհետև բանակի մարտունակության վառ ապացույցն այս քառօրյա պատերազմում հայ զինվորների հերոսական դրվագներն էին, քաղաքագետը պատասխանեց, որ զենքերի հին ու նոր լինելը հարաբերական է:

«100 հատ Տ 90 տանկերից բացի, որոնք Ադրբեջանը գնել է Ռուսաստանից` 2011-ից սկսած, նրա մնացած տանկերն ավելի հին են, քան հայկական տանկերը: Ադրբեջանը ունի տանկեր, որոնք 60-70-ականների արտադրության են: Միևնույն ժամանակ, Ադրբեջանն ունի որոշ զինատեսակներ, որոնք վերջին տասնամյակի արտադրության են, քանի որ հասկանալի պատճառներով Ադրբեջանն ունի ֆինանսական հնարավորություններ՝ որոշ տեսակի արդիական զենքեր գնելու և զինանոցը համալրելու համար: Ինչ վերաբերում է ռազմական ավիացիային, ապա Ադրբեջանն ունի ինքնաթիռներ, որոնք 70-ականների արտադրության են»,- ասաց քաղաքագետը: