Կինո հանելը հեշտ բան չի. Սերժ Սարգսյան

Այսօր Էրեբունի վարչական համայնքի բնակիչների հետ հանդիպման ժամանակ գործող նախագահ, նախագահի ՀՀԿ-ական թեկնածու Սերժ Սարգսյանը կեսկատակ-կեսլուրջ հայտարարեց, որ հիմա մեր ազգի կեսը երգում է, կեսն էլ` սերիալներում նկարահանվում:

Նախագահը, ինչպես պազրվեց, այդքան էլ դժգոհ չէ մեր սերիալներից: Նա խորհուրդ տվեց 7-10 տարի հետ գնալ եւ տեսնել` բրազիլիական, մեքսիկական սերիալներն են լա՞վը, թե՞ մերը:

''Վերջը փորձ են մարդիկ ձեռք բերում: Էդ կինո հանելը հեշտ բան չի, տեղից վեր կացողը չի կարող կինո հանել: Այսօր աշխարհի մեկ-երկու երկրներ են, որ կարողանում են նորմալ ֆիլմեր հանել: Մարդիկ պետք է փորձ ձեռք բերեն, որ արդյունքում էլ կունենանք նորմալ պրոդուկտ»,-հայտարարեց Սերժ Սարգսյանը:

Նա նշեց, որ «Գարեգին Նժդեհ» ֆիլմը հաջողված ֆիլմ է եւ դա «արդյունքն է նրա, որ ֆիլմի դերասանները բազամթիվ սերիալներում են խաղացել»:

Ուշագրավ է, որ երբ դահլիճում ներկա դերասաններից մեկը, ով եւ սերիալների մասին հարցն էր տվել, չհամաձայնեց նախագահ Սերժ Սարգսյանի գնահատականների հետ եւ հայտարարոց, որ որպես պրոֆիսիոնալ տեսակետից հարցին այլ կերպ է նայում, ինչին նախագահը գրեթե ծիծաղելով հակադարձեց. »Հասկանում եմ, դրա համար էլ տարբերվում ենք, դու մշակույթում ես աշխատում, ես` ուրիշ տեղ»: