ՀՊՖՆ-ի` Ցեղասպանության 100-րդ տարելիցին նվիրված համերգները` Ֆինլանդիայում, Դանիայում, Իտալիայում, Գերմանիայում, Ֆրանսիայում…

ՀՊՖՆ-ն իր այս տարվա առաքելությունն է համարում Ցեղասպանության զոհերի հիշատակի ոգեկոչումն ու Հայկական հարցի հանրայնացումը: Լրագրողների հետ հանդիպման ժամանակ նվագախմբի գեղարվեստական ղեկավար և գլխավոր դիրիժոր Էդուարդ Թոփչյանը նշեց, որ նվագախումբը «Հիշում եմ և պահանջում» կարգախոսի ներքո ապրիլի 10-15-ը հյուրախաղերով հանդես կգա սկանդինավյան երեք երկրներում:

«Համերգները տեղի կունենան ապրիլի 11-ին Տամպերեի (Ֆինլանդիա) համանուն համերգասրահում, ապրիլի 12-ին` Կոպենհագենում (Դանիա)՝ Դանիայի Ռադիոյի համերգասրահում, ապրիլի 13-ին` Օլբորգի (Դանիա) Մյուզիքենս Հուսում և ապրիլի 14-ին` Օսլոյի (Նորվեգիա) Մայր տաճարում: Համերգին, որպես մենակատարներ, հանդես կգան ջութակահարներ Իզաբել Ֆաուստը (Գերմանիա) և Հեննինգ Քրագերուդը (Նորվեգիա), դաշնակահարուհի Մարիաննա Շիրինյանը (Դանիա) և թավջութակահար Ալեքսանդր Չաուշյանը (Մեծ Բրիտանիա): Կատարենք Բեթհովենի, Գրիգի, Չայկովսկու, Շիմանովսկու և Խաչատրյանի ստեղծագործություններից»,- ասաց Թոփչյանը:

Նա տեղեկացրեց նաև, որ, բացի սրանից, նվագախումբը մայիս ամսին համերգով հանդես կգա ԱՄՆ-ում, հունիսին` Պետերբուրգում, օգոստոսին` Բեյրութում, նոյեմբեր և դեկտեմբեր ամիսներին` Ֆրանսիայում, Լեհաստանում, Գերմանիայում և Իտալիայում: