ՀԴՄ կտրոն տրամադրելն աներկբա է և սկզբունքների սկզբունքն է. ՀՀԿ

Այսօր ԱԺ արտահերթ նիստում, երբ քննարկվում էր «Շրջանառության հարկի մասին» օրենքում կառավարության առաջարկած փոփոխությունը, ՀՀԿ խմբակցության ղեկավար Վահրամ Բաղդասարյանը նշեց, որ ողջունում են այդ փոփոխությունը, որը տվեց իրավիճակային լուծում:

Նրա խոսքով՝ ՀՀԿ-ն միշտ էլ կողմնակից է եղել փաստաթղթավորմանը: Պատգամավորը կարծիք հայտնեց, որ այս փոփոխությունից հետո այլևս երեք տարի պետք չէ ձեռք տալ օրենքին և փոփոխություն չանել, որ տնտեսավարողները ադապտացվեն փոփոխություններին:

ՀՀԿ-ական պատգամավոր Վարդան Այվազյանը նշեց, որ փաստաթղթավորման պահանջը և ՀԴՄ կտրոն տրամադրելը աներկբա է և սկզբունքների սկզբունք է:

ՀՀ էկոնոմիկայի նախարար Կարեն Ճշմարիտյանն էլ նշեց, որ օրենքը նպատակ ունի կրճատել ստվերը և ավելացնել բյուջետային մուտքերը: Նախարարը ներկայացրեց 2014-ին և 2015թ. 2 ամիսների ընթացքում լուծարված և բացված ընկերությունների քանակը, որպեսզի ելույթներում այլևս չգերակայի այն միտքը, թե տնտեսվարողները համատարած լուծարվում են: