Ոտիկանությունից ազատված մոտ 200 աշխատակիցների հետ կնքված պայմանագրերը վերանայվում են

ՀՀ ոստիկանությունում իրականացվող «բարեփոխումների շրջանակներում» անցկացված ստուգումների  արդյունքում` փետրվարի 13-16-ն ընկած ժամանակահատվածում աշխատանքից ազատվեցին  ՀՀ ոստիկանության պետական պահպանության գլխավոր վարչության մոտ 190 աշխատակիցներ: Ըստ ոստիկանության` ազատված աշխատակիցներին առաջիկայում կփոխարինեն ավելի փորձառու կադրեր: Նշենք, որ ոստիկանության` աշխատանքից ազատված աշխատակիցները ժամանակին իրականացնում էին ԲՀԿ ղեկավար Գագիկ Ծառուկյանի տարածքների հսկողությունը: Շրջանառվող տեղեկությունների համաձայն` նրանց ազատելով, իշխանություններն ընդամենը մտադիր էին զինաթափել հենց ԲՀԿ ղեկավարին:

Այս կապակցությամբ  երեկ yerkir.am-ը գրավոր հարցում էր ուղարկել ՀՀ ոստիկանություն, մասնավորապես հետաքրքրվել էինք`

1. Ազատված աշխատակիցները տեղափոխվել են կադրերի ռեզե՞րվ, թե՞ հեռացվել են ոստիկանության համակարգից:

2. Ազատված աշխատակիցների թվում կա՞ն քաղծառայողներ, եթե` այո, նրանք տեղափոխվել են կադրերի կարճաժամկե՞տ, թե՞  երկարաժամկետ ռեզերվ:

3. Արդյո՞ք ազատված աշխատակիցներին փոխարինել են նոր կադրեր:

Ի պատասխան մեր հարցմանը` ՀՀ ոստիկանության  հասարակայնության հետ կապերի եւ լրատվության վարչությունից հայտնեցին, որ ոստիկանության պետական պահպանության գլխավոր վարչության կողմից վերանայվում են իրավաբանական և ֆիզիկական անձանց հետ կնքված պայմանագրերը: Այս պահին դրանք դեռ ընթացքի մեջ են: