Թուրքիան հնարավոր է խզի Ռուսաստանի հետ կնքված գազային պայմանագրերը

Թուրքիայի իշխանությունները հնարավոր է խզեն Ռուսաստանի հետ կնքված գազային պայմանագրերը, եթե ածխաջրածինների գները «զգալիորեն չիջեցվեն». հայտարարել է Թուրքիայի էներգետիկայի եւ բնական պաշարների նախարար Թաներ Յըլդըզը:

Ըստ Reuters գործակալության` ամեն տարի Թուրքիան Ռուսաստանից գնում է 30 մլրդ խորանարդ մետր գազ, ինչը երկրում սպառվող կապույտ վառելիքի 64 տոկոսն է:

Անկարան դիմել է Մոսկվային պայմանագրային գները նվազեցնելու առաջարկով, սակայն այս տարվա մարտին Մոսկվայում կայացած բանակցություններում փոխզիջման հանգել չհաջողվեց: Թուրքիայի վարչապետ Ռեջեփ Թայիփ Էրդողանի եւ ՌԴ նախագահ Դմիտրի Մեդվեդեւի հանդիպման ժամանակ վերջինս նշել էր, որ «Մոսկվան պատրաստ է դիտարկել տարբեր մոտեցումներ, արձագանքել ինչ-որ առաջարկների` շուկայական կոնյունկտուրան հաշվի առնելով, սակայն այդ գործընթացը պետք է լինի փոխադարձ»: