Մեր վրա կխնդա՞ք, էս ի՞նչ խայտառակություն է. Ավետիսյանների հարազատները դժգոհ են դատարանից

Գյումրիում տեղակայված 102-րդ ռուսական ռազմաբազայի տարածքում Ավետիսյանների սպանության գործով դատական նիստի մեկնարկին տեխնիկական խնդիրներ են առաջացել. դատական նիստերի դահլիճում Ավետիսյանների իրավահաջորդների ներկայացուցիչներ Լուսինե Սահակյանը, Երվանդ Վարոսյանը, Միհրան Պողոսյանը և Երեմ Սարգսյանը մնացել էին ոտքի վրա, քանի որ նրանց սեղան և աթոռներ չունեին:

Այս կապակցությամբ Լուսինե Սահակյանն իր դժգոհությունը հայտնեց՝ նշելով, որ նման պայմաններում չի կարող աշխատել: Ավետիսյանների հարազատներից մեկն էլ դահլիճից հայտարարեց, որ Ռոսաստանից է ժամանել, որպեսզի դատին մասնակցի: «Ես Ռուսաստանից եկել եմ` դատի մասնակցեմ, ի՞նչ խայտառակություն է, մեր վրա կխնդա՞ք: Լավ է դուրսն անենք, քան ստեղ, ամոթ է, էս ի՞նչ վիճակ է»,- բորբոքված հայտարարեց նա, ապա հավելեց. «Եթե ժամանակին թողնեին ցույցերը շարունակեինք, այժմ նման իրավիճակ չէր լինի, մեր հայկական դատարանում կանեինք»:

Այս պահին խնդիրը կարծես հարթվել է, և դատարանը կողմերին ծանոթացնում է իրենց իրավունքներին: