Մարդիկ կլինեն, որ ամաչելու խնդիր կունենան. Գալուստ Սահակյան

Yerkir.am-ի զրուցակիցն է ԱԺ ՀՀԿ խմբակցության ղեկավար Գալուստ Սահակյանը:

- Պարո'ն Սահակյան, նախ ուզում եմ հարցնել` համամիտ ե՞ք հայտնի քննարկման ժամանակ Սերժ Սարգսյանի տված գնահատականների հետ:

- Այդ հարցը ինչ չպետք է տաք, որովհետեւ դա ամբողջական տեսակետ է, եւ ես կարծում եմ` ավելին հնարավոր էլ չէ ասել, նախ` արձանագրման տեսակետից, ապա նաեւ` խոսքի սկզբունքի: Բնականաբար, գնահատականը շատ բարձր է:

- Այդ դեպքում ինչո՞ւ էիք դուք` ՀՀԿ-ականներդ, ԱԺ-ում ՎՊ տարեկան հաշվետվության քննարկումների ժամանակ այդպես ջանասիրաբար քննադատություններ հնչեցնում, բարձրաձայնում թալանչիների, լափողների մասին:

- Ես որեւէ տարօրինակ բան այդտեղ չեմ տեսնում: Քաղաքական մեծամասնությունը բոլոր հնարավորությունները ստեղծեց, որպեսզի ե'ւ ՎՊ-ն մինչեւ վերջ իր մտքերն ասի, ե'ւ կառավարությունը: Այն, ինչ նախագահը ներկայացրեց, բնականաբար, ոչ միայն ընդունելի է, այլեւ ՀՀԿ-ն ամբողջովին կիսում է այդ մտքերը: Մեր ձեւավորված քաղաքականությունն է` լինել ավելի բաց, ավելի թափանցիկ եւ այդ թափանցիկությունն այնպես դարձնել, որ վերահսկելի լինի ժողովրդի կողմից, որպեսզի ժողովուրդը կարողանա տրամաբանել, վերլուծել, դրանով իսկ իր մասնակցությունն ունենալ ընդհանուր գործին:

- Բայց ամեն դեպքում ՎՊ տարեկան հաշվետվության ժամանակ ՀՀԿ-ականների ելույթներն ու Սերժ Սարգսյանի հայտարարությունը հակասում են իրար:

- Որեւէ հակասություն չկա, ընդամենը վերլուծվել է ՎՊ-ի հաշվետվությունն այն տեքստով, որը ներկայացվել է: Մեր խնդիրը եղել է, որ ավելի շատ պարզաբանվի, որովհետեւ խորհրդարանը այն տեղն է, որի հանդեպ հասարակությունը եւ ԶԼՄ-ներն ավելի ուշադիր են: Եթե հաշվետվությունում անհասկանալի մտքեր կային, անկախ նրանից` որ կուսակցությունից է, պատգամավորը պարտավոր էր հարցեր տալ եւ այդ հարցերի պարզաբանումները ստանալ: Մեր դիրքորոշումը հետեւյալն էր` դետալ առ դետալ եւս մեկ անգամ հարցադրումներ անել, որպեսզի ե'ւ կառավարությունը, ե'ւ ՎՊ-ն կարողանան լիովին բացատրվել ԱԺ-ում, ինչը մենք հաջողել ենք: Կարծում եմ` բավականին լուրջ գործընթաց ստացվեց, շատ բաց եւ թափանցիկ, գնահատականը շատ բարձր էր:

- Տեսակետներ կան, որ Սերժ Սարգսյանը բարկացած է խորհրդարանական մեծամասնության վրա, որ չեն պաշտպանել կառավարությանը, ավելին` դեռ թալանչիներ եւ լափողներ են որակել:

- Նախ` կառավարությունը պաշտպանության կարիք չուներ, ոչ էլ` ՎՊ-ն: Դա ընդամենը ՎՊ-ի տարեկան հաշվետվությունն էր, որը պետք է ԱԺ-ի կողմից ի գիտություն ընդունվեր: Եղել են հարցադրումներ, հնչել են կարծիքներ, որպեսզի հասարակության համար ավելի ամբողջական, պարզ լինի, թե  վերահսկողության ինչպիսի նոր մոդելներ կարող են առաջանալ մեր պետության ներսում:

- Իսկ չե՞ք կարծում, որ խորհրդակցության ժամանակ նախագահը հրապարակավ ուղղորդեց դատախազությանը, թե ինչ եզրակացություն պետք է անեն ՎՊ-ի հաշվետվությունն ուսումնասիրելիս` հայտարարելով. «Ձեզ ընդամենը պետք էր 2-3 օր անցնել այդ հաշվետվությամբ եւ հայտարարությամբ հանդես գալ, ասել՝ ՀՀ հարգելի՛ քաղաքացիներ, ՎՊ-ի հաշվետվության մեջ ընդամենը 200 կամ 300 մլն դրամի հափշտակման կասկածանքի դեպքեր կան, մնացած բոլորը հեքիաթներ են»: Նախագահը որտեղի՞ց գիտի, որ խոսքն ընդամենը 200-300 մլն-ի մասին է:

- Այսինքն` միայն լրագրողնե՞րը գիտեն եւ մեր ընդդիմադիրնե՞րը: Այսինքն` կարելի է այնքան անկողմնորոշված լինել` մտածելու համար, որ բյուջեի 700 մլրդ-ը վատնվել է՞: Նման անհեթեթ տեսակետի հետ որեւէ մեկը կարո՞ղ է համաձայն լինել: Մեր բյուջեն հիմնականում աշխատավարձ է, խոսքը պետք է ոչ թե բյուջեին վերագրվեր, այլ այն ծրագրերին, որոնք իրականացվում են տարբեր ոլորտներում: Բյուջեն կարող է ռիսկային լինել, բայց ՎՊ-ի հաշվետվությունը ոչ թե պետք է գնահատականներ տար, այլ լիներ արձանագրային:

- Դո՞ւք էլ եք Իշխան Զաքարյանի գնահատականներտ «շատ սխալ եւ անհեռատես» որակում:

- Ես որեւէ մեկին այս պահին մեղադրել չեմ կարող եւ չեմ պատրաստվում, որովհետեւ արդեն ամբողջ հաշվետվությունը դատախազության քննության առարկա է դարձել: Երբ արդեն ամփոփ` որոշակի գնահատականներ կլինեն, արդեն յուրովի կգնահատենք նաեւ մենք:

- Մոտ օրերս Սերժ Սարգսյանը խորհրդարանական քաղաքական մեծամասնության պահվածքի մասին հանդիպում է նախատեսում: Ասում են` բավականին կոշտ զրույց է լինելու: Մտավախություն չունե՞ք, որ կարժանանաք նախագահի նախատինքին:

- Ես որեւէ կոշտություն չեմ տեսնում քննարկման փուլում, որովհետեւ քննարկումը հենց դրա համար է, որպեսզի հետագայում հանձնարարականներ լինեն: Մեր գործադիր մարմնում կքննարկվի: Ի՞նչ է նշանակում կնախատի, ի՞նչ կլինի: Բնականաբար, եթե խնդիրներ կան, բոլորն էլ պետք է նախատվեն, բոլորն էլ պետք է խոսեն, դա գործընթաց է ե'ւ քաղաքական առումով, ե'ւ պետական կանխորոշիչների: Վախենալ, երկմտել... Դա ինձ հարցնելու բան չէ, որովհետեւ ես կողմնակից եմ ե'ւ քննադատելուն, ե'ւ արձանագրելուն, եւ գնահատելուն: Ինքը` նախագահը, արդեն զգուշացրել էր, որ հետեւելու է արդյունքներին, ոչ թե միայն բուն աշխատանքին: Որեւէ մեկը վախ չունի: Միայն` մարդիկ կլինեն, որ ամաչելու խնդիր կունենան: Եթե գնահատականները կլինեն, ապացուցելի կլինեն, մարդիկ կլինեն, որ պետք է պատժվեն, նրանք էլ կամաչեն:

- Եվ վերջում` տեսակետներ կան, որ Իշխան Զաքարյանը չի շարունակելու երկրորդ ժամկետով պաշտոնավարումը, եւ որ նրա գլխին սեւ ամպեր են կուտակվել: Համամի՞տ եք այդ կարծիքների հետ:

- Ոչ, ես համամիտ չեմ, որովհետեւ գործնական քննարկումները, թերությունները, բացթողումները նշելը, դա առավելապես օգնում է հետագա գործընթացներին: Իսկ այսօր լարվածություն ստեղծել` որ ինչ-որ մեկի գլխին սեւ ամպեր են կուտակվել, ես համաձայն չեմ: Ի վերջո, մենք բոլորս մեկ ուղի ենք բռնել:

Զրուցեց Ագնեսա ԽԱՄՈՅԱՆԸ