Գյումրու սպանդի առաջին հետևանքն արդեն իսկ տեսանելի է. Վահան Արծրունի

Մեզ հասցրել են այն մակարդակին, որ կարող ենք հստակ ռեֆլեքսիաներ ցուցաբերել, երբ դժբախտություն է տեղի ունեցել, կամ երբ իրողությունը հասել է մեր դռան շեմին. Yerkir.am-ի հետ զրույցում ասաց երգիչ, երգահան Վահան Արծրունին` անդրադառնալով Գյումրու սպանդին:

Ըստ նրա` մարդկայնորեն դժվար է համակերպվել այս դեպքի հետ, դժվար է որևէ բացատրություն գտնել, քանի որ պատահածը մարդկային տրամաբանությունից ու երևակայությունից դուրս է:

«Այն, որ ժողովուրդը, լրագրողները, իրավաբանները փորձում են գտնել ինչ-որ բացատրություն, լուրջ պատճառ, որ հասկանալի դառնա` ի՞նչ է կատարվել, հասկանալի է: Կարծիքների բևեռացումը, ցասումը, որ կուտակվել է ապատիայի ֆոնին, ինձ համար ազդակ է, որ մենք բոլորս հանձնված ենք որոշակի քաղաքականության, ծրագրի քմահաճույքին, ու իրավիճակն է թելադրում մեր ինքնադրսևորումը: Իսկ սա նշանակում է, որ մենք կարող ենք կորցնել ժամանակի ընթացքի զգացողությունը, ինչը շատ վտանգավոր է, որովհետև նման իրադարձությունները միանգամից անդրադառնում են ամբողջ հանրության վրա»,- ասում է Արծրունին` հավելելով, որ նման դեպքն ի վիճակի է ստեղծել բարոյահոգեբանական մի մթնոլորտ, որը կստեղծի նոր ընթացքներ:

Ըստ նրա` Գյումրու դեպքի առաջին հետևանքը, որն արդեն զգացվում է, արտագաղթի այն ալիքն է, որը կրկին բարձրացավ. արդեն գարնանը կարող ենք հստակ թվերով խոսել այդ մասին:

Հարցին` արդյո՞ք սա այն դեպքն է, որ ոստիկանությունը պետք է լուռ աշխատի, Արծրունին պատասխանեց` բնականաբար, ոչ:

«Նման դեպքերում ոստիկանության աշխատանքը լրիվ թափանցիկ պետք է լինի, և ժողովուրդը պետք է ճիշտ ժամանակին իրազեկվի, քանի որ ժողովուրդը թշնամի չէ, նա մեծ ցավ է տանում, սարսափելի վշտի մեջ է: Այս ամենը պետք է հաշվի առնել: Գիտեմ, որ նախաքննության ընթացքում որոշակի գաղտնիություն պետք է պահպանվի, բայց սա այդ դեպքը չէ: Մաքսիմալ բաց պետք է լինի իրավապահ օրգանների աշխատանքը, որ նախ` նրանք էլ միգուցե իրենց հանդեպ ժողովրդի կորսված վստահությունը ձեռք բերեն, և ի վերջո, այս միջոցով ինքնահաստատվի այն գաղափարը, որ ոստիկանությունն ու քննչական օրգանները, վերջիվերջո, ազգային կառույց են»,- ասաց նա: