Հրաձգություն. Հայաստանի ներկայացուցիչը բրոնզե մեդալ է նվաճել միջազգային մրցաշարում

Հունվարի 24-31-ն ընթանում է Քուվեյթի 4-րդ միջազգային «Գրան պրին», որին Հայաստանից մասնակցում են Մարիամ Միքայելյանը, Զավեն Իգիթյանն ու Նորայր Առաքելյանը`  Հայաստանի հրաձգության ֆեդերացիայի գլխավոր քարտուղար Արեգ Սարիբեկյանի գլխավորությամբ:

Երեկ`  հունվարի 27-ին, Մարիամ Միքայելյանը մասնակցել է 10 մ, 40 կրակոց երիտասարդ աղջիկների մրցույթին, որին մասնակցել է 11 երկրի 16 մարզուհի:  Մարիամ Միքայելյանը խոցել է 408,7 միավոր և գրավել 3-րդ տեղը, նա 2 տասնորդականով զիջել է 2-րդ տեղը գրաված Բոսնիա և Հերցոգովինայի ներկայացուցիչ Տատյանա Դեկանովիչին, ով խոցել էր 408,9 միավոր: 1-ին տեղը գրավել է 411,5մրավոր խոցած ուզբեկ մարզուհի Մարգարիտա Օռլովան: 3-րդ տեղը գրաված մեր  Մարիամ Միքայելյանի անձնական մարզիչն է Անդրանիկ Այվազյանը:

Հայաստանի մյուս ներկայացուցիչներ Նորայր Առաքելյանն ու Զավեն Իգիթյանը հանդես կգան հունվարի 29-ին` օդամղիչ ատրճանակ ձևում:

Տեղեկացնենք նաև, որ  հունվարի 28-31-ը Հայաստանի հավաքական թիմի երկրորդական կազմը` մարզիկներ Սուսաննա Հովհաննիսյանը, Լիա Սահակյանը, Հայկ Բաբայանը, Վրեժ Թորոսյանը, ԷլմիրաԿարապետյանը և հիմնական կազմից` Քրիստիան ու Իրինա Լուերները կմասնակցեն Մյունխենյան միջազգային մրցաշարի` Հայաստանի հրաձգության հավաքական թիմի գլխավոր մարզիչ Սեյրան Նիկողոսյանի և հավաքականի երկրորդ մարզիչ Անդրանիկ Այվազյանի գլխավորությամբ: