Գիշերը Արցախում զոհված Կարենը 5 ամիս առաջ էր անցել պայմանագրային ծառայության

Yerkir.am-ի տեղեկություններով՝ հունվարի 22-ին՝ ժամը 23:25-ի սահմաններում, ՊԲ արևելյան ուղղությամբ տեղակայված զորամասերից մեկի պահպանության տեղամասում հակառակորդի կողմից մահացու վիրավորում ստացած պայմանագրային զինծառայող` 22-ամյա Կարեն Մարատի Ուլուբաբյանը ԼՂՀ Մարտունու շրջանից էր: Այս տեղեկությունը մեզ հետ զրույցում հաստատեցին Մարտունու շրջանի զինկոմիսարիատից:

Մեզ հայտնեցին, որ Կարենը պայմանագրային հիմունքներով ծառայության է անցել 2016-ի օգոստոսի 14-ին:

Մեր տեղեկություններով՝ Կարենը 4 զավակներից ավագն է:

Ավելի վաղ հայտնել ենք, որ հունվարի 22-ին և լույս 23-ի գիշերը ղարաբաղա-ադրբեջանական հակամարտ զորքերի շփման գծում հակառակորդը հիմնականում տարբեր տրամաչափի հրաձգային զինատեսակներից, հրադադարի պահպանման ռեժիմը խախտել է ավելի քան 55 անգամ՝ հայ դիրքապահների ուղղությամբ արձակելով շուրջ 430 կրակոց:

Շփման գծի արևելյան ուղղությամբ ադրբեջանական զինուժը առավել ինտենսիվ կրակ է վարել դիպուկահար հրացաններից (92 կրակոց), ինչպես նաև կիրառել է 82 միլիմետրանոց ականանետ (2 արկ): ՊԲ առաջապահ զորամասերը հակառակորդի նախահարձակ ակտիվությունը ճնշելու համար դիմել են պատասխան գործողությունների և շարունակել իրականացնել իրենց առջև դրված մարտական խնդիրը: