Տանեցիները սպասում էին նրա վերադարձին. զոհված զինծառայողն այսօր կամ վաղը պետք է զորացրվեր

Տեղեկացրել էինք, որ այսօր` ժամը 04:30-ի սահմաններում, ղարաբաղա-ադրբեջանական հակամարտ զորքերի շփման գծի հյուսիսարևելյան (Թալիշ) ուղղությամբ հակառակորդը ձեռնարկել է հետախուզադիվերսիոն ներթափանցման հերթական փորձը: Ծավալված մարտերի ընթացքում մահացու հրազենային վիրավորում է ստացել ՊԲ զինծառայող` 1995թ. ծնված Էրիկ Էդիկի Գրիգորյանը:

Նա Սյունիքի մարզի Շաքի գյուղից էր: Yerkir.am-ի հետ զրույցում Շաքիի գյուղապետ Վահե Ղազարյանը հայտնեց, որ տղան այսօր կամ վաղը պետք է զորացրվեր. ընտանիքն անհամբեր սպասում էր նրա վերադարձին:

«4 եղբայր և մեկ քույր են ընտանիքում: Եղբայրներից մեկն ամուսնացած է,  միասին են ապրում: Գյուղատնտեսական աշխատանքներով են զբաղվում: Եղբայրներից մեկն է աշխատում` խանութում բանվորություն է անում: Մայրը չի կարող աշխատել` վատառողջ է, իսկ հայրը մի քանի տարի առաջ է մահացել սրտի կաթվածից: Մի կերպ, ծերը-ծերին հասցնելով` ապրում են, էլի, սոցիալապես անապահով են»,- ասաց գյուղապետը: