Լավաշը վերցրեցին, վաղը հող էլ կպահանջեն. Թուրքիայում հիստերիա է

Թուրքիայում «Սեպտեմբերի 9» համալսարանի դասախոս Թյուրքան Բաշյիիթին ուսանողների այնպիսի հանձնարարություն է տվել, որը համացանցում մեծ արձագանքի է արժանացել:

Ըստ Radikal-ի՝ գիտությունների թեկնածու դասախոսը ուսանողներին հանձանարարել է Հայոց ցեղասպանությունը ժխտող աշխատանք գրել: Ուսանողները նկարահանել և համացանցում են տեղադրել հանձնարարության լուսանկարը, որը փակցված է եղել համալսարանի միջանցքի պատին:

Համացանցում տեղադրված լուսանկարի մեկնաբանություններին միացել են շատերը և դասախոսի արարքը ճիշտ չեն համարել՝ նշելով, որ այն միակողմանի է և գիտական մոտեցում չէ:

Twitter-ի օգտատերերից մեկը հարցրել է, թե «ի՞նչ է անելու դասախոսը, եթե ուսանողները ցեղասպանությունը փաստող աշխատություն ներկայացնեն»: Դասախոսն արձագանքել է քննադատություններին` նշելով, որ ինքը «պարզապես գիտական հարց է ներկայացրել»:

Հայտնի է դարձել նաև, որ նույն դասախոսը Twitter-յան էջում գրառում էր արել նաև լավաշի՝ UNESCO-ի ոչ նյութական մշակութային ժառանգության ցանկում ներառվելու մասին: Նա գրել էր. «Լավաշը վերցրին, վաղը հող էլ կպահանջեն»: Սա եւս մեծ արձագանք էր գտել սոցցանցում: