Թուրքական պետության գործակա՞լ եք. պատմում է Հասան Ջեմալը

Արդեն տեղեկացրել ենք, որ այսօր ԵՊՀ արևելագիտության ֆակուլտետում տեղի ունեցավ հանդիպում թուրքագիտության բաժնի ուսանողների և Հայոց ցեղասպանության գլխավոր իրագործողներից մեկի՝ Ջեմալ փաշայի թոռան՝ Հասան Ջեմալի հետ:

Կրտսեր Ջեմալը պատմեց իր հետ կատարված մի պատմություն:

«Անցած տարի միջին տարիքի մի մարդ մոտեցավ ինձ ու հարցրեց. «Թուրքական պետության գործակա՞լն եք, որ այսպես եք խոսում»: Թուրքիայի նման երկրներում, որտեղ ավտորիտարությունն է գերակայում, ընտելացել ենք դավադրությունների, մեզ դրան են ընտելացրել: Չենք կարողանում հավատալ, որ մարդը կարող է իր սեփական, անկախ տեսակետը հայտնել, հրաժարվել պետության դրած «սահմաններից» և պաշտոնական ստերից, բացահայտել դրանք և կոտրել դրանց հետևանքով առաջացած տաբուները»,-ասաց Ջեմալը՝ հավելելով.

«Օրինակ` դուք ապրում եք այստեղ՝ Հայաստանում: Անկասկած, դաստիարակվում եք հայաստանյան ազգայնամոլությամբ»:

Ներկա ուսանողներից մեկն ընդհատեց Հասան Ջեմալին՝ ուղղելով նրան. «Հայաստանում ազգայնամոլություն չէ, այլ հայրենասիրություն»: Հասան Ջեմալը պատասխանեց. «Ոչ ոք ինձ չի կարող հավատացնել, որ Հայաստանում ազգայնամոլություն չկա»: