Ըմբշամարտ. Միհրան Հարությունյանը` Բառնաուլի մրցաշարի հաղթող

Հունահռոմեական ոճի ըմբշամարտի Հայաստանի հավաքականի անդամ, 66 կգ քաշային կարգի Հայաստանի չեմպիոն` 25-ամյա էջմիածինցի Միհրան Հարությունյանը հաջող հանդես եկավ Ռուսաստանի Բառնաուլ քաղաքում կազմակերպված միջազգային մրցաշարում: Դեկտեմբերի 6-7-ը ընթացած ստուգատեսում Միհրանը անցկացրեց 4 գոտեմարտ և 4-ում էլ վստահ հաղթանակ տոնեց, ընդ որում` դրանք բոլորն էլ ժամանակից շուտ ավարտեց: 

Եզրափակիչում հայ ըմբիշը առավել քան համոզիչ առավելությամբ՝ 11:0, պարտության մատնեց 2012 թ. օլիմպիական խաղերի բրոնզե մեդալակիր Մինգիյան Սեմյոնովի (59 կգ) երկվորյակ եղբորը ՝ ռուսաստանցի ըմբիշ Սանալ Սեմյոնովին, ու հռչակվեց մրցաշարի հաղթող: 

Ինքը՝ ըմբիշը, այս հաղթանակը ֆեյսբուքյան իր էջում այսպես է մեկնաբանել. «Մեծ հաղթանակները ձևավորվում են քայլ առ քայլ: Կարևոր է յուրաքանչյուր մեկնարկում հաղթելը: Այսօր հաղթեցի Բառնաուլի մրցաշարում: Առջևում դեռ շատ աշխատանք, նպատակներ ու հաղթանակներ կան: Շնորհակալ եմ բոլորին, ովքեր հավատացել են ու հավատում են ինձ: Շնորհակալություն  աջակցության համար»:

Աղբյուր` Wrestling.am