Ըմբշամարտ. Գարիկ Բարսեղյանը՝ Անդիևի մրցաշարի գլխավոր մրցանակակիր

Երեկ Վլադիկավկազում մեկնարկեց օլիմպիական կրկնակի չեմպիոն Սոսլան Անդիևի մրցանակների 36-րդ խաղարկությունը: Այս ստուգատեսին Ռուսատանի ըմբիշներից բացի մասնակցում են ԱՄՆ-ի, Ուզբեկստանի, Ղազախստանի, Բելառուսի, Ադրբեջանի և Հայաստանի 250 մարզիկներ: 

Մրցաշարի բացման արարողությանը Սոսլան Անդիևից, մասնակիցներից, մարզիչներից, երկրպագուներից բացի ներկա էր նաև Հյուսիսային Օսեթիային կառավարության փոխնախագահ Ռուստեմ Կելեխսաևը: 

Ինչպես արդեն տեղեկացրել ենք, ազատ ոճի ըմբշամարտի Հայաստանի ազգային հավաքականի գլխավոր մարզիչ Արայիկ Բաղդադյանի ղեկավարությամբ հեղինակավոր մրցաշարում հանդես են գալիս նաև մեր հանրապետության առաջատար 8 ըմբիշներ: Համաձայն ժամանակացույցի՝ մրցաշարի առաջին օրը մրցագորգ դուրս եկան  57, 61, 65 և 70 կգ քաշային կարգերի ըմբիշները: 
Մեր պատվիրակներից առաջին օրը ելույթներ ունեցան Գարիկ Բարսեղյանը և Արտակ Հովհաննիսյանը (երկուսն էլ 57 կգ), Նարեկ Սանոյանն ու Վոլոդյա Ֆրանգուլյանը (երկուսն էլ 61 կգ), ինչպես նաև Մ. Սեդրակյանն ու Ս. Հովսեփյանը (երկուսն էլ 65 կգ): 
Առավել հաջող էր 57 կգ քաշային կարգում հանդես եկած մեր ներկայացուցիչների մրցելույթները: Այստեղ եզրափակիչ մտան ու գլխավոր մրցանակը վիճարկեցին հենց Հայաստանի երկու պատվիրակները: Վճռորոշ գոտեմարտում Եվրոպայի այս տարվա առաջնության բրոնզե մեդալակիր Գարիկ Բարեսղյանը 10:0 հաշվով առավելության հասավ այս քաշային կարգում Հայաստանի երկրորդ ներկայացուցչի՝ Արտակ Հովհաննիսյանի նկատմամբ ու արժանցավ Սոսլան Անդիևի գլխավոր մրցանակին: 
61 կգ քաշային կարգում բրոնզե մեդալի համար գոտեմարտում զիջելով մրցակցին՝ Նարեկ Սանոյանը գրավեց 5-րդ տեղը: 
Առաջին օրը մրցաշարի մնացած 3 քաշային կարգերում հաթողներ դարձան ու Անդիևի գլխավոր մցանակներին արժանացան Ռուսաստանի երեք ներկայացուցիչներ՝ Ացամազ Կոնիևը  (61 կգ), Ռուսլան Պլիևը (65 կգ) և Մահոմեդ Սայիպովը (70 կգ): Հայտնում է մարզաձևի Հայաստանի ֆեդերացիայի պաշտոնական կայքը: