Իշխանափոխության մասին հարց լսելով` ԲՀԿ-ականները «զբաղված» են դառնում

ԱԺ ԲՀԿ խմբակցության պատգամավորներից մի քանիսը զարմանալի զուգադիպությամբ զբաղված են լինում այն պահին, երբ նրանց ուղղվում է հետևյալ հարցը. «Իսկ ԲՀԿ-ն դնելո՞ւ է իշխանափոխության պահանջ»:

Մասնավորապես` ԱԺ ԲՀԿ խմբակցության պատգամավոր Հարություն Ղարագյոզյանը Yerkir.am-ի հետ զրույցում նախ նշեց, որ մասնակցելու է հոկտեմբերի 10-ին Երևանում նախատեսված հանչահավաքին, թեև ելույթ չի ունենալու հարթակից: Իսկ երբ հարցրեցինք, թե ԲՀԿ-ի կողմից իշխանափոխության պահանջ դրվելո՞ւ է, պատասխանեց. «Ես հիմա զբաղված եմ ու չեմ կարող խոսել»:

Գյումրիում գտնվող` ԱԺ ԲՀԿ խմբակցության պատգամավոր Աբրահամ Մանուկյանի հետ զրույցում էլ, երբ կրկին հասանք իշխանափոխության վերաբերյալ հարցին, հանկարծ պարզվեց, որ աղմուկ է. «Աղմուկ է, չեմ լսում»:

ԲՀԿ-ական պատգամավոր Արշակ Մխիթարյանն էլ չգիտեր՝ մասնակցելո՞ւ է հոկտեմբերի 10-ի հանրահավաքին: «Դեռ չգիտեմ, միգուցե և գնամ, դեռ չգիտեմ»,- ասաց նա: Մեր հարցին` արդյո՞ք ինչ-որ բան կաշկանդում է, որ մասնակցի, պատասխանեց. «Ուղղակի ես այդ օրերին շատ զբաղված եմ լինելու, չգիտեմ` կարող եմ մասնակցել, թե` ոչ: Հիմա էլ շատ զբաղված եմ»: