Բռնցքամարտի Հայաստանի երիտասարդական հավաքականն ուսումնամարզական հավաք է անցկացնում

Բռնցքամարտի Հայաստանի երիտասարդական հավաքականը մարզիչ Վազգեն Բադալյանի գլխավորությամբ սեպտեմբերի 27-ից 7-օրյա ուսումնամարզական հավաք է անցկացնում Ծաղկաձորում: Հավաքի նպատակն է լավագույնս նախապատրաստվել հոկտեմբերի 17-ից 26-ը Խորվաթիայի մայրաքաղաք Զագրեբում կայանալիք Եվրոպայի երիտասարդական առաջնությանը: 

Երիտասարդական հավաքականի ավագ մարզիչը Ծաղկաձորյան հավաքին հրավիրել է 13 բռնցքամարտիկների: Վազգեն Բադալյանի տրամադրության տակ են 49 կգ քաշայիններ Արթուր Հովհաննիսյանն ու Ալեն Դանիելյանը: 52 կգ քաշային Դավիթ Ասատրյանը, 56 կգ քաշայիններ Արսեն Պողոսյանն ու Սպարտակ Թամարյանը: 60 կգ քաշայիններ Ժորա Համազարյանն ու Սամվել Մելիքյանը: 64 կգ քաշային Արարատ Գյուլբանգյանը, 69 կգ քաշային Տիգրան Մելքոնյանը, 75 կգ քաշային Արմեն Մինասյանը, 91 կգ քաշային Սերյոժա Հակոբյանը և գերծանր քաշայիններ Գնել Մուրադյանն ու Արամ Աբրահամյանը: