Հրաձգություն. Լիլիթ Մկրտչյանը՝ աշխարհի երիտասարդական առաջնության փոխչեմպիոն

Իսպանիայի Գրանադա քաղաքում շարունակվում է հրաձգության աշխարհի երիտասարդական առաջնությունը, որտեղ, բացի մեդալներից, ստուգատեսին մասնակցող 94 երկրի 2000 հրաձիգներ պայքարում են նաև 2016թ. օլիմպիական խաղերի 64 ուղեգրերի համար: Մասնակից հայ հրաձիգներից 7-ը, չնայած մասնակցում են երիտասարդական տարիքային խմբում, սակայն պատանիներ են:  

Այսօր  10մ, վազող թիրախ (30+30 կրակոց)  մրցաձևի մարզիկներն ավարտել են վարժությունը: Աղջիկների (20+20 կրակոց)  պայքարում Հայաստանը ներկայացնող Լիլիթ Մկրտչյանը նվաճել է աշխարհի երիտասարդական առաջնության արծաթե մեդալը:

 1-ին հորիզոնականով եզրափակիչ են անցել հունգարացի Վերոնիկա Մաջոռը` 372 միավորով, նրան հետևել է  Լիլիթ Մկրտչյանը` 359 միավորով, 3-րդը՝ Քաթարը ներակացնող Սաաիդա Թաաեեբը` 348 միավորով, 4-րդը` ֆրանսուհի Ֆլորենս Լուիսը` 340 միավորով: Կիսաեզրափակիչում Լիլիթը 6:4 հաշվով հաղթել է քաթարցի Սաաիդա Թաաեեբին, իսկ եզրափակիչում ոսկու համար պայքարում 6:2 հաշվով պարտվել է Վերոնիկա Մաջոռին  և արժանացել աշխարհի երիտասարդների առաջնության փոխչեմպիոնի կոչմանը: Բրոնզե մեդալի է արժանացել  Ֆլորենս Լուիսը: