Հաջորդ հաղթանակս նվիրելու եմ Ցեղասպանության 100-րդ տարելիցին. Սյուզի Կենտիկյան

Գերթերթև քաշային կարգի WBA, WBO, WIBF վարկածներով աշխարհի չեմպիոնուհի Սյուզի Կենտիկյանն այս օրերին Հայաստանում է: Այսօր տեղի ունեցավ մարզուհու մամուլի ասուլիսը: Սկզբում Կենտիկյանը խոսեց Հայաստանում իր տպավորությունների մասին:

- Արդեն երեք օր է ինչ այստեղ եմ: Շատ կարոտել էի Հայաստանը: Վերջին անգամ 4 տարի առաջ էի եղել այստեղ և որոշեցի, որ պետք է գամ, տեսնեմ  իմ հարազատներին և իմ հայրենիքը: Այս 3 օրերի ընթացքում հանդիպում եմ ունեցել  ՀԱՕԿ-ի նախագահ Գագիկ Ծառուկյանի, սփյուռքի նախարար  Հրանուշ Հակոբյանի և սպորտի և երիտասարդության հարցերով նախարար Գաբրիել  Ղազարյանի հետ:

-Ի՞նչ ծրագրեր ունեք առաջիկայում:

-Հաջորդ մենամարտում  պաշտպանելու եմ չեմպիոնական գոտին և հաղթանակի դեպքում այն նվիրելու եմ  Հայոց ցեղասպանության 100-րդ տարելիցին, սակայն դեռ հայտնի չէ, թե ով կլինի իմ մրցակիցը:   Այժմ Գերմանիայում  պատրաստվում են ֆիլմ նկարահանել իմ մասին, որտեղ նաև  կլինի հատված  իմ` Հայաստան այցելության վերաբերյալ:

-Ինչպե՞ս սկսեցիք զբաղվել բռնցքամարտով:

-Փոքր հասակում զբաղվել եմ տարբեր սպորտաձևերով, սակայն իմ դուրը շատ եկավ  հենց սա: Երբ սկսեցի զբաղվել բռնցքամարտով, այդ ժամանակ մարզվողների մեջ միայն ես էի աղջիկ: Այդ ժամանակ ես հաճախում էի դպրոց, այնուհետև` մարզումների, իսկ մարզումներից հետո նույնիսկ գնում էի աշխատանքի:  Մեր ընտանիքը ֆինանսական ծանր վիճակում էր այդ ժամանակներում,  իսկ մեզ փորձում էին դուրս հանել Գերմանիայից, սակայն երբ իմացան, որ ես զբաղվում եմ սպորտով, արդեն Գերմանիայի անձնագիր տրամադրեցին մեզ:  Բռնցքամարտն իմ կյանքն է, և ես չեմ պատկերացնում ինձ առանց այս սպորտաձևի:

-Ո՞րն է քեզ համար ամենամեծ ձեռքբերումը:

-Ինձ համար ամենամեծ ձեռքբերումը աշխարհի չեմպիոնի կոչումը նվաճելն է եղել, իսկ դրանից հետո կրած պարտությունից հետո ես շոկի մեջ էի:  Հաջորդ մենամարտում կրկին հաղթանակ տոնեցի և կրկին նվաճեցի չեմպիոնական գոտին: Դա ինձ համար ամենամեծ ուրախությունն էր: Ամեն ինչ կանեմ, որ իմ կարիերան ավարտեմ չեմպիոնական մենամարտով: