Դատարանները շեղվել են արդարադատություն իրականացնելուց. փաստաբան

Չորս տարի ձգձգված դատական վեճը, անցնելով երեք ատյաններով, վերջապես ստացավ իր վերջնական լուծումը, բայց արդեն կայացված վճռի դեմ բողոք է ներկայացնում քաղաքապետ Տարոն Մարգարյանը:

Վճռի առարկային Yerkir.am-ն արդեն անդրադարձել է: Հիշեցնենք` երկու քաղաքացի` Նազիկո Պալյանը եւ Սումբատ Մարտիրոսովը,  Երևանի Սեւքարեցի Սաքոյի փողոցում գնել են մեկ սեփական տան երկու մասեր: Որոշ ժամանակ անց Սումբադ Մարտիրոսովը (նրա մահից հետո դատական վեճի ժամանակ պատասխանողներ են եղել նրա զավակաները` Հենրիկ և Ծովիկ Մարտիրոսյանները` որպես իրավահաջորդներ) իրեն պատկանող հողամասի մի մասում երեքհարկանի առանձնատուն է կառուցել: Եվ որպեսզի բակն ավելի մեծ լինի, քաղաքապետարանից մյուս տան իրեն պատկանող հատվածը քանդելու թույլտվություն է ստացել ու անցել գործի: Տան մասնակի քանդումից հետո այն գնահատել են որպես 3-րդ կարգի վթարային շենք:  Նազիկո Պալյանի  անշարժ գույքին պատճառված վնասները դատական կարգով` անցնելով 3 ատյաններ, փոխհատուցվել են:  Սակայն խնդրի լուծումից հետո քաղաքապետ Տարոն Մարգարյանը դիմել է վերաքննիչ դատարան` նշելով երկու հանգամանք` առաջին`դատական ակտը վերաբերում է նաև քաղաքապետի իրավունքներին և շահերին, երկրորդ` քաղաքապետը դատական վեճի մասին իմացել է վերջերս, և այդ իսկ պատճառով էլ ուշ է բողոք ներկայացրել:

Ըստ Նազիկո Պալյանի փաստաբան Տիգրան Հայրապետյանի` վերաքննիչ դատարանը պարտավոր էր հարգել օրինական ուժի մեջ մտած դատական ակտը: «Անգամ ասեմ, որ քաղաքապետը չեկավ դատական նիստին, ինչը նշանակում է, որ քաղաքապետը հրաժարվում է իր բողոքից»,- լրագրողների հետ հանդիպման ժամանակ ասաց նա: «Մենք արդեն բողոք ենք ներկայացրել, որպեսզի գործը վարող դատավորների լիազորությունները դադարեցվեն: Դա գուցե զսպաշապիկ կլինի մյուս դատավորների համար: Բացի այդ` մենք դատարան ենք ներկայացրել Երևանի քաղաքապետի կողմից ստորագրված և կնքված մի քանի փաստաթղթեր, որոնցով հաստատվում է, որ հենց քաղաքապետն է հաստատել, որ իրենց շահերը չեն շոշափվում այս վեճի ընթացքում»,- ասաց Հայրապետյանը:

Ըստ նրա` այսօր դատական համակարգում անհասկանալի իրավիճակ է տիրում, դատարանները շեղվել են արդարադատություն իրականացնելուց:

Իսկ Նազիկո Պալյանն ասաց, որ խնդրի լուծման համար դիմելու են հանրապետության նախագահին, դեսպանատներին, մարդու իրավունքների Եվրոպական դատարան: