Պատանի հայ ծանրորդները սկսում են Նանկինի նախապատրաստությունը

Նանկինի պատանեկան օլիմպիական խաղերին նախապատրաստվող հայ ծանրորդները այսօրվանից սկսում են ուսումնամարզական հավաքների շարքը հատուկ այս կարևոր ստուգատեսի համար:

Հիշեցնենք, որ Հայաստանը ձեռք է բերել ծանրամարտ մարզաձևի երեք ուղեգիր (երկու տղա, մեկ աղջիկ), իսկ թե ով Նանկինում կներկայացնի Հայաստանը, պարզ կդառնա նախատեսված 3-4 հավաքից հետո: Այդ նպատակով Աբովյանում առաջին հավաքին մասնակցելու են հրավիրվել 5 ծանրորդ ու 2 ծանրորդուհի:

«Աբովյանում կլինենք մինչև ապրիլի երեքը, այնուհետև մի քանի օր հանգստից հետո հավաք կանցկացնենք Ծաղկաձորում: Եվս երկու հավաք էլ մինչ խաղերի սկիզբը կանցկացնենք, ու այդ հավաքների արդյունքում կորոշվի Նանկին մեկնողների վերջնական կազմը»,- մարզաձևի Հայաստանի պաշտոնական կայքի հետ զրույցում ասել է պատանիների մարզիչ Վիգեն Խաչատրյանը: