Ի՞նչ է կատարվել Ցյուրիխում հայ-թուրքական արձանագրությունների ստորագրումից առաջ. Քլինթոնն անկեղծացել է իր գրքում

Հայաստանի արտաքին գործերի նախարար Էդվարդ Նալբանդյանը համառում էր. ըստ Yerkirmedia.am-ի` Հիլարի Քլինթոնն է իր նոր գրքում այսպես նկարագրել այն պահը, որը 2009 թվականին Ցյուրիխում նախորդել է Հայաստանի եւ Թուրքիայի միջեւ արձանագրությունների ստորագրմանը:

Կայքը մեջբերում է` թարգմանաբար. «Երեկոյան ես դուրս եկա հյուրանոցից եւ ուղղվեցի Ցյուրիխի համալսարան, որտեղ տեղի էր ունենալու հանդիսավոր արարողությունը: Բայց խնդիր էր ծագել` Նալբանդյանը՝ Հայաստանի նախարարը, համառում էր: Նա մտահոգ էր ստորագրման արարողության համար Դավութօղլուի պատրաստած ելույթով եւ հանկարծ հրաժարվեց դուրս գալ հյուրանոցից: Թվում էր, որ ամիսներով նրբորեն առաջ մղված բանակցությունները տապալվելու էին»:

Հիլարի Քլինթոնը նաեւ ավելացնում է, թե ինքն իսկույն որոշեց ժամանակ չկորցնել, Հայաստանի եւ Թուրքիայի պաշտոնակիցներին համոզեց, որ արձանագրություններն ստորագրեն առանց որեւէ ելույթի ու հեռանան:

Ինչ վերաբերում է արձանագրությունների հետագա ճակատագրին, թեեւ կողմերից ոչ մեկի խորհրդարանը դրանք չի վավերացրել, Քլինթոնը հույս ունի, որ վճռական բեկում լինելու է: Հիլարի Քլինթոնի՝ հունիսի 10-ին ԱՄՆ-ում հրապարակված անգլերեն գիրքը կոչվում է «Բարդ ընտրանք»: 

Մանրամասներն` այստեղ: