Եվս մեկ ինքնաբացարկ` Սուրիկ Խաչատրյանի թեկնածուն մնաց

Մոտ կես ժամ առաջ ինքնաբացարկի դիմում է ներկայացրել նաեւ Գորիսում հուլիսի 8-ին սպասվող քաղաքապետի ընտրությունների եւս մեկ թեկնածու՝ Տիգրան Կարապետյանը:

Տիգրան Կարապետյանի ինքնաբացարկի մասին լուրը Yerkir.am-ի հետ զրույցում հաստատեց թիվ 37 ընտրատարածքային ընտրական հանձնաժողովի նախագահ Արմեն Ստեփանյանը:

Yerkir.am-ի հետ զրույցում Տիգրան Կարապետյանը, զերծ մնալով լրացուցիչ հայտարարություններից կամ պարզաբանումներից, նշեց միայն, թե ստեղծված պայմաններում սա ամենաճիշտ որոշումն էր:

Նշենք, որ մինչ այսօր Գորիսում գրանցված էր քաղաքապետի 4 թեկնածու՝ ՀՀԿ-ական Վաչագան Ադունցը, ում առաջադրել էր ՀՀԿ-ն և որը, ըստ Գորիսում շրջանառվող լուրերի, համարվում է Սյունիքի նախկին մարզպետ Սուրիկ Խաչատրյանի հովանավորյալն ու ներկայացուցիչը, և հենց նրա միջոցով է Սուրիկ Խաչատրյանը փորձում մասնավորապես Գորիսում պահպանել իր՝ օր օրի թուլացող դիրքերը:

Ինքնաառաջադրվել էին նաև անկուսակցական Հրայր Յոլյանը, ով, ըստ Գորիսում շրջանառվող լուրերի, որոնց մասին Yerkir.am-ին տեղեկացրել էր հենց Յոլյանը, նույնպես համարվում է  Սուրիկ Խաչատրյանի մարդը եւ ինքնաառաջադրվել էր հօգուտ Վաչագան Ադունցի ձայներ փախցնելու նպատակով: Այս լուրերը հերքեց հենց Հրայր Յոլյանը:

Մյուս երկու թեկնածուները ընկերներ են` ինքնաառաջադրված Արա Բուդաղյանն ու Տիգրան Կարապետյանը: Այսօր երկուսն էլ ինքնաբացարկ ներկայացրեցին:

Արա Բուդաղյանը Սուրիկ Խաչատրյանի տան մոտ անցյալ տարի սպանված Ավետիք Բուդաղյանի եղբայրն է: Նա հանդես էր գալիս մեկ այլ ՀՀԿ-ական ինքնաառաջադրված թեկնածուի՝ Տիգրան Կարապետյանի հետ համատեղ ճակատով: Տիգրան Կարապետյանը, ի դեպ, Սյունիքի ներկայիս մարզպետ Վահե Հակոբյանի ընկերն է:

Օրեր առաջ Yerkir.am-ի հետ զրույցում թե' Տիգրան Կարապետյանը, թե' Արա Բուդաղյանի շտաբի համակարգող Ռոբերտ Հակոբյանը հայտարարել էին, որ իրենք միևնույն ճակատից են, իրար դեմ չեն պայքարելու, և ընտրապայքարի ինչ-որ փուլում նրանցից մեկնումեկը ինքնաբացարկ կհայտնի' հօգուտ մյուսի: Այսօր առավոտյան, երբ Արա Բուդաղյանն ինքնաբացարկ ներկայացրեց, Ռոբերտ Հակոբյանը հայտարարեց, որ Բուդաղյանն իր թեկնածությունը հանեց հօգուտ Տիգրան Կարապետյանի:

Ու զարմանալի է, որ Տիգրան Կարապետյանը նույնպես, այն էլ` հենց այսօր ինքնաբացարկ ներկայացրեց, քանի որ գոնե մեզ հետ զրույցում վստահ ու վճռական էր տրամադրած եւ հայտարարում էր, որ մինչեւ վերջ գնալու է՝ հաղթելու վճռականությամբ:

Այսպիսով՝ ընտրապայքարից դուրս եկան Սուրիկ Խաչատրյանի հովանավորյալ Վաչագան Ադունցի հիմնական մրցակիցները` նրան դարձնելով քաղաքապետի պաշտոնի ամենահավանական հավակնորդը, քանի որ Գորիսում ցածր էին գնահատում Յոլյանի շանսերը: