Վաղը կանցկացվի ազգային կինոյի «Հայակ - 2014» մրցանակաբաշխությունը

Մայիսի 13-ին Ազգային կինոյի զարգացման հիմնադրամը օպերայի և բալետի ազգային ակադեմիական թատրոնում կանցկացնի «Հայակ-2014» մրցանակաբաշխությունը:

Ազգային կինոյի այս մրցանակաբաշխությունն ընդգրկում է ինչպես Հայաստանի արտադրության ու հայաստանցի ռեժիսորների, այնպես էլ սփյուռքահայ ռեժիսորների և հայկական թեմաներով օտարազգի ֆիլմարտադրողների նկարահանած ֆիլմեր:

Հայաստանի արտադրության ու Հայաստանի քաղաքացիների նկարահանած ֆիլմերը կներկայացվեն 16 անվանակարգում (լավագույն ֆիլմ, լավագույն ռեժիսոր, լավագույն սցենարիստ, լավագույն օպերատոր, լավագույն դերասան, դերասանուհի և այլն):

Սփյուռքի հայազգի ռեժիսորների և հայկական թեմաներով օտարազգի ֆիլմարտադրողների ֆիլմերի համար սահմանվում է մեկական անվանակարգ` «Լավագույն ֆիլմ»:

Կտրվեն նաև Ռուբեն Մամուլյանի, Համո Բեկնազարյանի, Սերգեյ Փարաջանովի անվան մրցանակներ, ինչպես նաև հատուկ մրցանակներ ՀՀ մշակույթի նախարարության և Հայկական ազգային կինոակադեմիայի կողմից:

Մշակույթի նախարարության կայքի տեղեկացմամբ՝ այս տարի «Հայակը» կհյուրընկալի անվանի կինոգործիչների և արվեստագետների:

Մրցանակաբաշխությանն աջակցում են մշակույթի նախարարությունը, Հայաստանի ազգային կինոկենտրոնը և Հայկական ազգային կինոակադեմիան: