«Հայակ»-ին այս տարի չսպասեք` տեղի կունենա 2016-ի գարնանը

Ազգային կինոյի զարգացման հիմնադրամի ու «Հայակ» ազգային կինոյի մրցանակաբաշխության կազմկոմիտեն որոշում է կայացրել հերթական «Հայակը» 2016 թվականի գարնանն անցկացնելու մասին։ «Հայակ-2016»-ը ամփոփելու է 2014-2015 թթ. Հայաստանում և արտերկրում արտադրված հայկական ֆիլմերն ու գնահատելու է ոլորտի զարգացումներն ու ձեռքբերումները: Սույն որոշումը պայմանավորված է 2015-ի Հայոց ցեղասպանության 100-րդ տարելիցին նվիրված միջոցառումների գերհագեցած ու բազմաբնույթ ծրագրերի անցկացումով՝ Հայաստանում ու արտերկրում։

Բացի այդ` Հայոց ցեղասպանության 100-րդ տարելիցի առիթով պետական աջակցությամբ նկարահանվել և շարունակվում են նկարահանվել մեկ տասնյակից ավելի ֆիլմեր ինչպես Հայաստանում, այնպես էլ արտերկրում։ Ուստի կազմկոմիտեն, հաշվի առնելով այս հանգամանքը, որոշում է կայացրել հաջորդ տարվա մրցանակաբաշխության անվանակարգերի ցանկում ավելացնել առանձին անվանակարգ՝ հատուկ Հայոց ցեղասպանության թեմայով ֆիլմերի համար: